Wanpela Wok Man i Mas Mekim Long Pasin Daun
1 Tok Bilong God i tokim yumi long ‘lusim pasin bilong bikhet. Sapos ol man i mekim nogut long yumi, orait yumi no ken bekim. Yumi mas beten long God i ken mekim gut long ol.’ (1 Pi. 3:8, 9) Dispela tok i stret tru long wok autim tok. Wok Kristen bilong autim tok inap traim pasin bilong yumi long daunim yumi yet.
2 Pasin daun i save helpim yumi long sanap strong na karim hevi. Taim yumi autim tok, yumi yet i go long ol man i no singautim yumi i kam, na yumi save olsem dispela bai kirapim sampela long mekim nogut long yumi. Yumi mas i gat pasin daun bambai yumi inap wok yet long autim tok maski ol man i mekim olsem. Long wanpela kantri, inap tupela yia olgeta, tupela painia sista i go long haus na autim tok, tasol i no gat wanpela man i toktok wantaim ol. Tasol tupela i no lusim wok, na long nau i gat tupela kongrigesen long dispela hap.
3 Taim Man i Tok Strong: Pasin daun bai helpim yumi long bihainim pasin bilong Jisas taim ol man i mekim nogut long yumi. (1 Pi. 2:21-23) Wanpela sista i bin i go long wanpela haus, na pastaim meri bilong haus i krosim em na bihain man bilong meri tu i krosim sista, na em i tok strong long sista i mas lusim banis bilong ol. Sista i smail tasol na tok olsem ating narapela taim em inap toktok wantaim ol. Dispela tupela marit i kirap nogut tru long pasin sista i mekim, na bihain taim narapela Witnes i go long haus bilong ol, ol i putim yau long ol tok bilong em na ol i orait long i go long miting long Haus Kingdom. Dispela sista ol i bin krosim em long pastaim, em i bungim ol na tok amamas long ol, na bihain em i go lukim ol long haus na autim tok long ol. Yumi tu inap daunim kros bilong ol man i no laik harim tok taim yumi “bekim tok bilong ol long tok isi na long gutpela pasin.”—1 Pi. 3:16; Snd. 25:15.
4 Abrusim Pasin Antap: Yumi gat save long Baibel tasol dispela i no ken kirapim yumi long ting olsem yumi winim ol man o mekim ol tok i daunim ol, nogat. (Jo. 7:49) Tok Bilong God i tok long yumi “no ken tok nogut long wanpela man.” (Ta. 3:2) Taim yumi daunim yumi yet olsem Jisas i bin mekim, yumi helpim ol narapela. (Mt. 11:28, 29) Pasin daun i save kirapim ol man long putim yau long tok bilong yumi.
5 Yes, pasin daun i save helpim yumi long wok strong yet long ol teritori i gat ol man i les long harim tok i stap long en. Em inap daunim kros bilong ol man i no laik harim tok, na em inap kirapim ol narapela long putim yau long tok bilong Kingdom. Tasol bikpela samting moa yet, em i mekim Jehova i belgut, em Man “i save marimari na mekim gut long ol man i daunim ol yet.”—1 Pi. 5:5.