No Ken Lusim Laik Yu Bin Kisim Pastaim
1 Jisas i tokim kongrigesen long Efesus: “Mi gat tok long yu olsem, taim yu bilip nupela, yu bin laikim mi tru, tasol nau nogat.” (KTH 2:4) Planti i bin lusim pasin bilong laikim tru Jehova. Taim yumi lainim tok i tru nupela, yumi bin kisim pasin bilong laikim tru God na ol narapela, na dispela i bin kirapim yumi long givim bel long autim nupela bilip bilong yumi. Wanem samting bai helpim yumi long holimpas dispela laik na amamas yet long autim tok?
2 Stadi na Go Long Ol Miting: Taim yumi lainim tok i tru nupela, wanem samting i bin kirapim yumi long laikim tru God na ol narapela? Em ol save yumi bin kisim long Jehova long rot bilong stadi long Baibel, a? (1 Jo. 4:16, 19) Olsem na bilong pasin laikim bilong yumi i ken “kamap strong moa,” yumi mas wok yet long kisim stretpela save na ol “tingting hait bilong God.”—Fl. 1:9-11; 1 Ko. 2:10.
3 Nau long dispela taim bilong las de, i gat planti wari na ol samting bilong pulim tingting bilong yumi, olsem na pasin bilong bihainim gutpela sediul bilong stadi i gat hatwok long en. (2 Ti. 3:1) Yumi mas makim taim bilong kisim kaikai bilong spirit. Pasin bilong go long ol miting, dispela tu i bikpela samting, long wanem, “De bilong Krais em i kam klostu.”—Hi. 10:24, 25.
4 Wok Autim Tok: Pasin bilong givim bel long wok autim tok i save helpim yumi long laikim tru God olsem yumi bin laikim em pastaim. Taim yumi autim gutnius, yumi tingim ol gutpela tok promis bilong Jehova, olsem na samting yumi wet long en i stap klia tru long tingting bilong yumi na pasin laikim bilong yumi i stap strong. Bilong skulim gut ol narapela long ol tok i tru bilong Baibel, yumi mas mekim wok painimaut bambai yumi yet inap kliagut long ol dispela tok, na dispela bai strongim bilip bilong yumi.—1 Ti. 4:15, 16.
5 Jehova i wokim olgeta samting, olsem na em inap tru long yumi laikim em tumas. (KTH 4:11) No ken larim pasin laikim bilong yu i go slek. Mekim stadi bilong yu yet long Baibel, go oltaim long ol miting, autim tok long ol samting i nambawan tru long yu, ol dispela samting bai strongim pasin bilong yu long laikim tru God em yu bin kisim taim yu bilip nupela.—Ro. 10:10.