Wokabaut Olsem Man i Gat Save
1 Taim Jisas i askim 4-pela man bilong kisim pis long bihainim em, ol i no westim taim, “kwiktaim” ol “i go bihainim em.” (Mt. 4:18-22) Taim Sol bilong taun Tarsus i kamap Kristen na em inap lukluk gen, em i no westim taim, “em i go stret long ol haus lotu bilong ol Juda, na em i autim tok olsem, Jisas em i Pikinini Bilong God.” (Ap. 9:20) Taim i save ron hariap tru na i go pinis olgeta. Olsem na em i bikpela samting long “wokabaut olsem man i gat save” long pasin bilong yusim taim bilong yumi.—Ef. 5:15, 16.
2 Taim Nogut i Save Painim Yumi Olgeta: Nau yumi gat taim long mekim laik bilong Jehova tasol yumi no save wanem samting bai kamap tumora. (Jem. 4:14) No gat wanpela man inap abrusim taim nogut, long wanem, “taim nogut i save painim yumi olgeta.” (Sav. 9:11) Na tu, yumi olgeta i wok long i go lapun olsem na yumi no inap abrusim ol hevi bilong “taim nogut” bilong lapun, em ol dispela samting i mekim na yumi no inap mekim bikpela wok bilong Jehova long nau. (Sav. 12:1) Olsem na em i no gutpela tingting long surikim taim bilong dediket long God o wetim gutpela taim bai kamap pastaim bilong yumi ken mekim laik bilong God. (Lu. 9:59-62) Abraham i stap bel isi long taim em i kamap lapun, na em i dai taim “em i lapun tru na em i amamas long laip bilong en,” long wanem, em i mekim gutpela wok long laip bilong em bilong mekim laik bilong Jehova.—Stt. 25:8.
3 Taim i Sot: Yumi tu i laik mekim gutpela wok long taim bilong yumi, long wanem, “taim i sotpela nau.” (1 Ko. 7:29-31) Klostu nau ol pasin nogut bilong dispela graun bai pinis. Wok bilong bungim ol manmeri i olsem sipsip long dispela taim bilong kisim “kaikai bilong graun i mau” em bai i pinis. (KTH 14:15) Yumi mas was gut na bai yumi no ken larim ol tingting na wari bilong dispela graun i pulim taim bilong yumi long mekim wok autim tok. (Lu. 21:34, 35) Yumi bai belgut tru taim yumi lukluk i go bek na tingim olsem yumi bin wok strong long mekim tru dispela wok bilong bungim kaikai!
4 Yumi mas redi oltaim na bai yumi inap insait long ol wok em rot i op long yumi inap mekim. Yumi mas i gat strongpela tingting long mekim olgeta samting yumi inap mekim “nau” bilong mekim laik bilong Jehova. (Hi. 3:13) Taim yumi mekim olsem yumi kamapim klia olsem yumi bihainim gutpela tingting, long wanem, “man i bihainim tok bilong God, em bai i stap oltaim.”—1 Jo. 2:17.