Strongim Narapela Narapela Long Taim Bilong Autim Tok
1 Yumi olgeta i save amamas taim wanpela i mekim gutpela tok long yumi long taim stret. (Snd. 25:11) Taim yumi wok wantaim ol narapela long autim tok, olsem wanem yumi ken mekim tok i strongim ol?
2 Tok i Strongim Bel: Taim yumi autim tok, i gutpela long toktok wantaim ol bratasista long ol samting inap helpim yumi olgeta long pas gut wantaim God! (Sng. 37:30) Yumi ken stori long tok yumi laik autim o wanpela gutpela ekspiriens yumi bin kisim taim yumi autim tok. (Ap. 15:3) O yumi ken stori long wanpela gutpela samting yumi bin lainim long Baibel ritim, o wanpela magasin, o long wanpela tok yumi bin harim long miting. Yumi inap stori long sampela bikpela tok yumi bin harim long wanpela pablik tok long Haus Kingdom.
3 Ating yumi bel hevi taim wanpela man long haus i kamapim wanpela tok yumi no inap long bekim gut. Taim yumi lusim dispela man, i gutpela long toktok wantaim poroman bilong yumi long olsem wanem yumi inap bekim tok long kain man olsem. Ating yumi ken mekim wok long buk Toktok Gut. Na sapos yumi laikim sampela tok poroman i mekim long autim tok, yumi ken tok amamas long em long dispela samting.
4 Go Pas Long Strongim Ol Narapela: Olsem wanem? I gat sampela long buk stadi grup bilong yumi em longtaim liklik yumi no bin wok wantaim ol long autim tok? Sapos yumi askim wanpela long i go wantaim yumi long autim tok, dispela inap opim rot bilong narapela i ken “strongim bel” bilong narapela. (Ro. 1:12) Ol painia oltaim na ol painia haptaim i amamas sapos ol narapela pablisa inap autim tok wantaim ol, na moa yet long ol bikmoning o long ol apinun, taim wan wan pablisa tasol inap autim tok. Yumi inap sapotim ol painia sapos yumi go autim tok wantaim ol. Olsem wanem? I gat wanpela pablisa em i sik na em i no inap autim tok tumas? Yu ken stretim rot bilong em i ken go wantaim yu long Baibel stadi, dispela bai strongim em na yu tu.—Snd. 27:17.
5 Pasin bilong tok amamas long narapela—long ol liklik samting tu—i save strongim bel bilong man. Yumi mas tingim dispela samting taim yumi wok wantaim ol narapela long autim tok, long wanem, yumi laik “strongim” narapela narapela.—1 Te. 5:11.