Olsem Wanem Yumi Ken Helpim Ol Man i Kam Long Memorial?
1 Long Mas 22, 2008, planti milion manmeri long olgeta hap bilong graun bai lukim wanpela bikpela samting. Ol man i kam long Memorial bai harim tok long bikpela pasin laikim bilong Jehova long givim pe bilong baim bek ol man. (Jo. 3:16) Ol bai kisim save long Kingdom na olsem wanem Jehova bai mekim wok long en bilong kamapim laik bilong em long graun. (Mt. 6:9, 10) Ol bai lukim long ai bilong ol yet pasin laikim na pasin wanbel i stap namel long lain bilong God, na ol bai pilim gutpela pasin yumi mekim long ol.—Sng. 133:1.
2 Ol Baibel Sumatin: Sampela i kam em ol man nau tasol ol i kirap stadi long Baibel. Kisim ol i go bungim ol brata na sista. Stori long ol long ol miting i save kamap long olgeta wan wan wik, na soim ol long ol samting i stap long Haus Kingdom. Long taim brata i mekim tok, em bai kirapim ol long wok yet long mekim ol samting bilong pas gut wantaim Jehova. Yu ken mekim wok long tok bilong em bilong strongim ol Baibel sumatin bilong yu.
3 Ol Pablisa i Lusim Wok Autim Tok: Sampela i kam em ol pablisa i lusim wok autim tok longtaim pinis. Yu mas tok amamas long ol i kam. No ken kamapim ol askim o tok i mekim ol i sem. Sampela de bihain long Memorial, ol elda i mas go lukim ol pablisa husat i lusim wok autim tok, na tok amamas long ol i bin kam, na singautim ol i kam long ol narapela miting.
4 Ol Nupela Man i Kam: Sampela i kam ating em ol lain yumi save long ol o em ol famili bilong yumi em yumi yet i bin singautim ol. Ating ol narapela i kam em ol man husat i bin kisim invatesen pepa bilong Memorial taim yumi mekim bikpela wok bilong singautim ol man. Sapos yu lukim sampela em yu no save long ol, orait yu mas i go sekanim ol na tok amamas long ol i kam. Ating ol i no bin i kam long wanpela miting bilong yumi long bipo. Long taim yupela i toktok, ating yu inap painimaut long olsem wanem yu ken bungim ol gen. Sampela de bihain long Memorial, yu ken i go lukim ol o ringim ol bilong kirapim ol long kisim sampela save moa na tokim ol olsem yu laik stadi wantaim ol long Baibel.
5 Taim yu mekim gobek, yu ken kamapim sampela tok i bin kamap long Memorial bilong tilim buk Baibel i Tok long man. Brata i mekim tok bilong Memorial bai ritim Aisaia 65:21-23. Long taim yu mekim gobek, yu ken stori long dispela tok na tok olsem, “Mi laik soim yu ol narapela blesing em dispela ofa bai opim rot long yumi ken kisim.” Orait skelim pes 4-5 bilong buk Baibel i Tok. O yu ken tok, “Planti man i laik save long wanem taim bai yumi lukim truim bilong tok profet bilong Aisaia.” Orait nau skelim paragraf 1-3 long sapta 9. Narapela rot em yu ken kamapim tok brata i bin mekim long Memorial, na tilim buk Baibel i Tok long man na soim em long pasin bilong mekim stadi.
6 Gutpela sapos yumi olgeta wan wan i painim rot bilong helpim ol Baibel sumatin, ol pablisa i lusim wok autim tok, na ol nupela man i kam long Memorial. (Lu. 22:19) Jehova bai blesim bikpela wok moa bilong Kingdom yumi mekim.
[Askim Bilong Stadi]
1. Wanem wanpela bikpela samting ol man bai lukim long Mas 22, 2008?
2. Olsem wanem yumi ken helpim ol Baibel sumatin i kam long Memorial?
3. Olsem wanem yumi ken strongim ol pablisa i lusim wok autim tok?
4. Olsem wanem yumi olgeta wan wan i ken helpim ol nupela man i kam?
5. Yumi ken mekim wanem tok bilong kirapim wanpela Baibel stadi?
6. Yumi olgeta i gat rot long mekim wanem taim yumi bihainim tok bilong Jisas long tingim indai bilong em?