Stap Olsem Gutpela Helpim Long Taim Bilong Autim Tok
1. Taim yumi autim tok wantaim wanpela poroman, dispela i helpim yumi olsem wanem?
1 Wanpela taim, Jisas i salim 70 disaipel i go bilong autim tok, na em i “salim ol i go tupela tupela.” (Lu. 10:1) Long dispela rot ol disaipel inap helpim na strongim narapela narapela taim ol i autim tok. Taim yumi autim tok wantaim narapela pablisa, olsem wanem yumi inap helpim em?
2. Taim poroman bilong yu i autim tok, olsem wanem bai yu putim gut yau? Bilong wanem yumi mas mekim olsem?
2 Putim Gut Yau: Putim gut yau taim poroman bilong yu i autim tok. (Jem. 1:19) Sapos em i ritim wanpela skripsa, orait bihainim long Baibel bilong yu yet. Lukluk long man i toktok, maski em poroman bilong yu o man bilong haus. Sapos yu putim gut yau, dispela inap kirapim man bilong haus long mekim wankain pasin.
3. Long wanem taim poroman bilong yumi inap askim yumi long toktok?
3 Luksave Long Wanem Taim Yu Ken Toktok: Taim yumi sanap wantaim poroman husat i autim tok, yumi soim pasin rispek long em taim yumi larim em i go pas long toktok. (Ro. 12:10) Yumi mas abrusim pasin bilong katim tok. Sapos em i lusim tingting long tok em i laik mekim o man bilong haus i no wanbel long wanpela tok, o i givim wanpela askim na poroman i askim yumi long helpim em, orait yumi ken skruim sampela tok moa long wankain samting em i toktok long en, na no ken stori long narapela samting. (Snd. 16:23; Sav. 3:1, 7) Sapos yumi toktok, orait yumi mas mekim ol tok bilong sapotim tok poroman i mekim pinis.—1 Ko. 14:8.
4. Wanem samting bai helpim yumi long kisim amamas na mekim gutpela wok long autim tok?
4 Taim ol 70 disaipel i mekim pinis wok autim tok bilong ol na ol i kam bek, “ol i amamas tru.” (Lu. 10:17) Yumi tu bai amamas na mekim gutpela wok long autim tok taim yumi putim gut yau na luksave long wanem taim yumi ken toktok taim yumi helpim poroman bilong yumi long autim tok.