Mekim Wok Autim Tok i Kamap Gutpela Moa—Gutpela Helpim Bilong Autim Tok
Em i Bikpela Samting: Jisas i save olsem em i bikpela samting long wok wantaim narapela taim yumi autim tok. Olsem na taim em i salim 70 disaipel i go paslain long em na autim tok, em i salim ol i go 2-pela 2-pela. (Luk 10:1) Poroman i ken helpim pablisa em i wok wantaim sapos pablisa i hatwok long kirapim tok o em i no save long hau em bai bekim askim bilong man. (Sav. 4:9, 10) Em i ken stori long ol samting i bin helpim em na wan wan taim em i ken kamapim sampela tok bilong helpim pablisa em i wok wantaim long mekim gut wok bilong autim tok. (Snd. 27:17) Na tu, taim ol i wokabaut i go long ol narapela narapela haus bilong autim tok, toktok bilong em i mas strongim pablisa.—Fili. 4:8.
Rot Bilong Mekim:
• Putim gut yau taim poroman i autim tok. (Jems 1:19) Na taim em i ritim Baibel, yu ken bihainim long Baibel bilong yu. Long dispela rot, yu inap long helpim em taim em i nidim helpim.
• Skelim gut sapos i stret long yu kamapim sampela tok na wanem taim yu ken mekim. (Snd. 25:11) Taim yu go wantaim narapela pablisa long Baibel stadi, em bai amamas sapos wan wan taim yu kamapim sampela tok. Tasol taim yupela i autim tok long ol haus, ating poroman bilong yu bai amamas long yu larim em yet i stori sapos em i taim bilong em long autim tok. Tru sapos em i nupela pablisa o em i no save olsem wanem em bai bekim askim bilong man, em bai amamas long yu helpim em. Tasol maski yu autim tok wantaim wanpela pablisa long ol haus, lukim ol gobek, o ol Baibel stadi, no ken katim tok, kalapim tok na kirap toktok, o kirap stori long narapela samting.
• Stori long ol samting i bin helpim yu. Sapos inap, sampela taim yu ken stori long poroman bilong yu long autim tok long wanem ol samting i helpim yu long mekim gut wok bilong autim tok, na no ken pasim maus. (Snd. 3:27) Sapos i stret long mekim, yu ken tok: “Yu amamas long tok yu mekim?” o “Inap mi kamapim sampela tingting?” o “Mi yet mi save mekim olsem.” Tingim, sampela i save amamas sapos wan wan taim yumi mekim tok bilong helpim ol, tasol ol bai bel hevi sapos olgeta taim yumi stretim olgeta liklik popaia bilong ol.
Long Dispela Mun, Traim Dispela:
• Taim yutupela poroman bilong yu i autim tok pinis, tokim em olsem tok em i kamapim o samting em i mekim, dispela i mekim na em i stap gutpela helpim bilong autim tok.