Rot Bilong Skulim Ol Nupela Pablisa Long Autim Tok
1. Yu pilim olsem wanem long namba wan taim yu bin insait long wok autim tok?
1 Yu tingim yet namba wan taim yu bin autim tok long ol haus? Ating yu bin pret tru long dispela taim. Sapos yu bin wok wantaim man i skulim yu long Baibel o narapela pablisa, ating yu amamas tru long helpim em i bin givim yu. Orait nau yu save gut pinis long mekim wok autim tok, olsem na yu inap helpim ol nupela long autim tok.
2. Ol nupela pablisa i mas lainim wanem samting?
2 Ol nupela pablisa i mas lain long pasin bilong kirapim tok wantaim man bilong haus, mekim wok long Baibel, mekim ol gobek, na kirapim na mekim ol Baibel stadi. Ol i mas lain tu long autim tok long kain kain rot, olsem tilim ol nius long rot na autim tok long ol man long bisnis teritori. Yu ken helpim ol long mekim gut moa ol dispela samting long rot bilong pasin bilong yu na ol gutpela tok yu givim ol.
3. Olsem wanem yumi inap helpim narapela long rot bilong pasin bilong yumi?
3 Skulim Ol Long Rot Bilong Pasin Bilong Yu: Jisas i soim ol disaipel bilong em long pasin bilong autim tok. (Lu. 8:1; 1 Pi. 2:21) Taim yu pasim tok wantaim wanpela nupela pablisa long mekim wok autim tok, ol tok yu redim bilong autim tok i mas isi na pablisa i ken bihainim, ating mekim wok long ol tok i stap long ol nius bilong yumi. Na tokim em olsem yu ken autim tok long namba wan na namba tu haus na bai pablisa i ken harim ol tok yu kamapim. Taim yupela wokabaut i go long narapela haus, ating yu ken askim pablisa long em i ting wanem long pasin bilong yu long autim tok. Dispela bai helpim em long luksave olsem em i bikpela samting long wok wantaim ol narapela, na long dispela rot em i no hatwok long kisim ol tok yu givim em taim em i autim tok pinis long wanpela haus.
4. Olsem wanem yumi ken helpim nupela pablisa bihain long yumi bin putim yau long tok em i mekim long man bilong haus?
4 Givim Tok Bilong Helpim: Jisas i bin tokim ol disaipel bilong em long pasin bilong autim tok. (Mt. 10:5-14) Long wankain pasin yu inap helpim nupela pablisa. Putim gut yau long taim em i autim tok. Na bihain taim yupela lusim haus, mekim tok amamas na kolim stret sampela tok em i bin mekim gut, maski yu lukim olsem em i mas stretim yet sampela pasin bilong em long autim tok. Paslain long yu kamapim tok bilong helpim em, ating i gutpela yu lukim pastaim sapos em no mekim gen dispela popaia long narapela haus. Ating em i pret tasol. Tingim, save bilong olgeta pablisa i no wankain, na tu, i gat planti rot bilong mekim gut wanpela samting.—1 Ko. 12:4-7.
5. Yumi ken mekim wanem tok taim yumi laik givim sampela tok bilong helpim nupela pablisa?
5 Sampela taim nupela pablisa bai askim yu long givim sampela tok bilong helpim em. Tasol sapos em i no mekim olsem, orait yu yet i ken go pas long helpim em. Olsem wanem yu inap helpim em? Sampela pablisa husat i save gut long autim tok i save askim olsem, “Inap mi givim sampela tok bilong helpim yu?” o, “Yu ting wanem long wok autim tok bilong yu?” Narapela rot em long tok olsem, “Taim mi nupela pablisa, mi bin hatwok long . . . , tasol dispela i bin helpim mi. . . . ” Sampela taim em i gutpela long skelim wantaim narapela ol tok bilong buk Toktok Gut. Givim tok bilong helpim em long wanpela pasin bilong em long autim tok, na bai yu no mekim em i tingting planti.
6. Long wok autim tok, olsem wanem ‘ain i sapim ain’?
6 Ain i Sapim Ain: Timoti, em wanpela man husat i save gut long autim tok, tasol Pol i bin strongim em long wok yet long mekim gut wok tisa na kamap strong moa. (1 Ti. 4:13, 15) Maski yu bin kirap autim tok inap planti yia i go pinis, yu mas wok yet long mekim autim tok bilong yu i kamap gutpela moa. Kisim skul long ol pablisa em yu wok wantaim ol, maski ol i no gat bikpela save yet long autim tok, na long gutpela pasin yu mas redi long helpim ol narapela, na moa yet ol nupela, long kamap man bilong mekim gut wok bilong autim gutnius.—Snd. 27:17.