Mekim Wok Autim Tok i Kamap Gutpela Moa—Trenim Ol Nupela

Bikpela Samting: Ol nupela disaipel bilong Jisas i mas lain long bihainim “olgeta samting” em i skulim ol long en, em pasin bilong skulim ol narapela long tok i tru. (Mat. 28:19, 20) Planti nupela i winim mak bilong insait long Skul Tiokratik Bilong Autim Tok na ating ol i kirap autim tok long ol famili o ol pren bilong ol. Olsem na taim ol i amamas long samting ol i lainim na ol i save olsem Jehova i laik bai olgeta manmeri i mas harim gutnius, ating ol bai soim olsem ol i laik insait long wok bilong autim tok. (Rom 10:13, 14) Taim ol elda i tok orait long ol nupela long kamap pablisa i no baptais, ol bai kisim gutpela trening na dispela bai helpim ol long kamap strong moa long ol samting bilong lotu.—Luk 6:40.

Rot Bilong Mekim:

Helpim ol nupela pablisa long ritim ol nius em bai yusim long taim em i autim tok na skulim ol man. Soim em hau yu save putim gut ol buk na nius samting long beg bilong yu bilong autim tok, na stori long as na yu save kisim ol nius i go wantaim yu.
Yutupela i ken makim wanpela rot bilong autim tok i stap long Wok Kingdom na mekim traim. Kirapim nupela pablisa long mekim kirap bilong tok long toktok bilong em yet. Mekim traim long ol tok long kain kain pasin bilong autim tok em buk Skul Bilong Autim Tok, p. 82 i stret long teritori. Stori gut long em olsem klos na bilas bilong yumi em i bikpela samting.—2 Kor. 6:3, 4.
Givim gutpela trening long ol. Soim nupela pablisa long ol teritori bilong autim tok, na soim em long hau em i ken raitim gut ol tok long notbuk taim em i autim tok. Soim em long hau em i ken raitim long notbuk nem bilong ol man husat i laik harim. Soim em long pasin bilong yusim Web-sait jw.org long wok autim tok, na tu, buklet Good News for People of All Nations . Helpim em long kirapim laik bilong man i laik harim tok.—1 Kor. 3:6.
No ken les kwik, na mekim tok amamas long em. (Snd. 25:11) Stap olsem gutpela piksa. Pasin bilong yu long givim bel na tingim gut ol narapela, dispela bai kamapim gutpela samting long bihain.

Long Dispela Mun, Traim Dispela:

Autim tok wantaim Baibel sumatin bilong yu na kisim em i go long ol gobek na ol Baibel stadi bilong yu. Sapos yu no gat Baibel sumatin, askim wanpela pablisa i no save gut long autim tok long wok wantaim yu.