Namba 10 Hap—Mekim Ol Baibel Stadi i Save Helpim Ol Man
Skulim Ol Sumatin Long Autim Tok Long Ol Haus
1 Taim ol elda i ting wanpela Baibel sumatin i winim mak bilong kamap pablisa i no baptais, em inap kirap autim tok wantaim kongrigesen. (Lukim Oganaisesen Bilong Mekim Laik Bilong Jehova, p. 79-81 o Lo Bilong Yumi Bilong Mekim Wok Autim Tok, p. 97-9.) Yumi ken mekim wanem bilong helpim sumatin long autim tok long ol haus?
2 Redi Gut Wantaim: Wok bilong redi gut em i bikpela samting. Soim sumatin long ol tok yumi ken mekim bilong autim tok i stap long Wok Kingdom na long buk Toktok Gut, na helpim em long makim wanpela kirap bilong tok i no hatwok na i wok gut long teritori bilong yupela. Long taim em i kirap autim tok, strongim em long yusim Baibel.—2 Ti. 4:2.
3 Mekim traim long pasin bilong autim tok, dispela bai helpim tru nupela pablisa. Taim sumatin i mekim traim long autim tok, soim em long olsem wanem em i ken bekim ol tok em planti man i save kamapim long teritori. (Kl. 4:6) Tokim em olsem ol wokman Kristen i no inap save long bekim bilong olgeta askim man bilong haus inap kamapim. Em i gutpela long tokim man bilong haus olsem yu bai mekim wok painimaut pastaim na kam bek bihain long toktok long dispela samting.—Snd. 15:28.
4 Autim Tok Wantaim: Long namba wan taim sumatin i autim tok long ol haus, larim em i lukim pasin bilong yu long mekim dispela tok yutupela i bin redim wantaim. Orait nau kirapim em long mekim sampela tok. Sampela taim i gutpela long tokim nupela pablisa long mekim sampela tok tasol, olsem ritim skripsa na stori long en. Tingim pasin na save bilong sumatin. (Fl. 4:5) Mekim tok amamas long em taim yu skulim em long insait long kain kain pasin bilong autim tok.
5 Em i bikpela samting long helpim nupela pablisa long wokim sediul bilong autim tok oltaim, autim tok long olgeta wik sapos inap. (Fl. 3:16) Makim taim bilong autim tok wantaim em, na kirapim em long autim tok tu wantaim ol narapela strongpela pablisa. Pasin bilong ol long givim bel long wok na pasin pren bilong ol bai helpim em long lain gut long autim tok long ol haus na amamas long mekim dispela wok.