Namba 11 Hap—Mekim Ol Baibel Stadi i Save Helpim Ol Man
Helpim Ol Sumatin Long Mekim Ol Gobek
1 Taim wanpela Baibel sumatin i kirap mekim wok autim tok, em bai bungim ol man i gat laik long harim gutnius. Olsem wanem yumi ken helpim nupela pablisa long mekim gut ol gobek na long helpim ol man i laik harim tok?
2 Wok bilong redi long mekim gobek i mas kirap long namba wan taim yumi bungim man. Strongim sumatin long tingim tru ol man em i toktok wantaim ol. (Fl. 2:4) Lainim sumatin long kirapim ol man bilong haus long kamapim tingting bilong ol, long putim yau long tok ol i mekim, na long luksave long ol samting ol dispela man i wari long en. Taim wanpela man i harim tok, tokim nupela pablisa long raitim long notbuk ol bikpela samting bilong dispela man na ol tok em i bin mekim. Yusim dispela save i stap long notbuk bilong helpim pablisa long redim ol tok em i ken mekim long man bilong haus long narapela taim.
3 Redi Long Go Bek: Skelim gen ol tok i bin kamap long namba wan taim sumatin i bungim man, na soim sumatin long olsem wanem em i ken makim wanpela tok bilong Kingdom em man bilong haus bai amamas long kisim save long en. (1 Ko. 9:19-23) Redim wantaim sumatin wanpela sotpela tok i kamapim wanpela skripsa na paragraf bilong wanpela buk samting. Na tu, redim wanpela askim sumatin i ken kamapim long pinis bilong toktok bilong redim rot bilong go bek. Soim nupela pablisa long pasin bilong givim sampela save moa bilong Baibel long man bilong haus long olgeta wan wan taim em i go lukim em.
4 Em i gutpela long lainim sumatin long mekim wanpela sotpela kirap bilong tok. Taim em i tok gude pinis, em inap tok: “Mi amamas long toktok yumi bin mekim, na nau mi kam bek bilong kamapim sampela tok moa bilong Baibel long yu [kolim samting yu laik toktok long en].” Ating yu mas soim nupela pablisa long ol tok em i ken mekim sapos narapela man i stap long haus.
5 Givim Bel Long Go Bek: Strongim sumatin long stap olsem gutpela piksa long pasin bilong go bek hariap long lukim ol man i laik harim tok. Ating sumatin i mas go bek planti taim bilong painim ol man long haus. Lainim sumatin long pasin bilong makim taim wantaim man bilong haus bilong go bek lukim em, na helpim sumatin long kliagut olsem em i bikpela samting long go bek olsem em i bin tok promis long man bilong haus. (Mt. 5:37) Skulim nupela pablisa long mekim gutpela pasin, pasin rispek, na tingim narapela, taim em i painim ol man i olsem sipsip na i kirapim laik bilong ol long harim tok.—Ta. 3:2.