Givim Bel Long Wok Autim Tok
Namba 3 Hap: Helpim Narapela Long Kamap Strong
1 Planti taim Sosaiti i bin stori long lapun Pol i lainim na helpim yangpela man Timoti long pasin bilong autim tok, na Sosaiti i tok em i gutpela pasin bilong yumi bihainim long nau. (1 Ko 4:17) Pol i tokim Timoti em i mas helpim ol narapela man long wankain pasin olsem Pol i bin helpim em, na em i mas givim wankain tok long ol. (2 Ti 2:1, 2) Gutpela sapos yumi bihainim wankain pasin long kongrigesen long nau tu.
2 Lainim Ol Narapela: Yumi save yumi gat bikpela wok bilong lainim ol narapela, long wanem lain pablisa long Papua Niugini i go bikpela na i winim bilong 3-pela yia bipo inap 300. Ol dispela nupela man bai amamas tru sapos strongpela pablisa i helpim ol. Wanpela sista i save autim tok inap olsem wanpela o tupela aua tasol long mun, tasol bihain wanpela strongpela pablisa i helpim em long pasin bilong autim gut tok. Pastaim em i pret long autim tok, tasol bihain em i kamap wanpela strongpela pablisa. Nau em i mekim wok painia, na em i mekim gut dispela wok bilong em. Em i tingim bek pasin bilong em bipo, na em i tok: “Pastaim mi no save long pasin bilong autim gut tok, tasol wanpela i lainim mi long mekim, na bihain mi amamas long mekim wok autim tok.”
3 Sapos yu wanpela elda, o wanpela wokman bilong kongrigesen, o wanpela painia, o strongpela pablisa, yu inap mekim wanem bilong helpim ol narapela long kamap strong long wok autim tok? Sapos yu laik helpim narapela pablisa, gutpela sapos yu tokim brata i lukautim Buk-Stadi yu go long en.
4 Skelim Gut Taim Bilong Mekim Ol Samting na Redi Gut: Sapos yu pasim tok long autim tok wantaim narapela pablisa, em gutpela. Ating pastaim dispela pablisa bai pret liklik long autim tok, tasol sapos man bilong haus i givim strongpela askim o tok long en, bai em i amamas long yu stap wantaim em bilong helpim em. (Sav 4:9) Gutpela sapos yupela autim tok long wanpela hap em ol manmeri i save amamas long toktok wantaim yumi long tok bilong Baibel. Dispela samting bai helpim nupela pablisa, long wanem, rot bai op long em i ken toktok wantaim man na bihain bai em i no pret moa long autim tok.
5 Bilong helpim dispela pablisa moa yet, gutpela sapos yu stori long em long pasin bilong mekim gobek long man i bin harim tok. Taim em i toktok wantaim man long namba wan taim, em i ken givim wanpela askim long em, na taim em i go bek em i ken kamapim bekim bilong dispela askim. Helpim nupela pablisa long redi long mekim gobek, na yu mas i go wantaim em long lukim dispela man. Sapos nupela pablisa i kirapim wanpela stadi, tasol em i pret liklik long lukautim dispela stadi, orait strongpela pablisa i ken poromanim em inap sampela wik na mekim dispela stadi i go inap long taim nupela pablisa i no pret moa long lukautim dispela stadi.
6 Planti nupela man i wok long hariap i kam insait long oganaisesen bilong Jehova, olsem na yumi save yumi mas wok long lainim ol dispela nupela man long pasin bilong autim gut tok. Ol strongpela pablisa i mas helpim ol nupela pablisa. Sapos yu inap helpim wanpela nupela pablisa, bihain em tu bai i gat save “inap long skulim ol arapela man.”—2 Ti 2:2.
[Ol Askim]
1. (a) Kaunim 1 Korin 4:17. Pol i helpim Timoti olsem wanem? (b) Kaunim 2 Timoti 2:1, 2. Pol i givim wanem strongpela tok long Timoti? Yumi mas ting olsem wanem long dispela tok long nau?
2, 3. (a) Wanem samting i bin helpim wanpela sista na em i kamap strongpela pablisa na bihain em i mekim wok painia? (b) Sapos yu gat rot bilong helpim narapela long autim gut tok, gutpela sapos yu mekim wanem?
4, 5. Yumi ken mekim wanem bambai yumi ken skelim gut taim bilong mekim ol samting na yumi redi gut long helpim nupela pablisa?
6. Bilong wanem yumi mas wok strong moa long nau long bihainim tok bilong 2 Timoti 2:2?