Kisim Skul Long Ol Pablisa i Save Gut Long Autim Tok
Yumi amamas long i gat ol pablisa i save gut long autim tok i stap long kongrigesen. Sampela i bin stap gut long wok bilong Jehova inap planti yia. Na sampela em nau tasol ol i wok long skul gut long pasin bilong autim tok. Ol dispela pablisa i bin lukim olsem Jisas i stiaim kongrigesen Kristen long dispela taim bilong las de, olsem na wok bilong autim tok na kamapim ol disaipel i go bikpela tru. (Mat. 28:19, 20) Long rot bilong wok autim tok, ol i kisim “strong i winim strong bilong yumi ol man” taim ol hevi na traim i painim ol. (2 Kor. 4:7) Yumi inap lainim planti samting long ol dispela pablisa. Taim rot i op, ol i amamas long lainim ol narapela long ol samting ol yet i bin kisim save long en. (Sng. 71:18) Olsem na wok gut wantaim ol na kisim skul long ol. Yumi inap mekim olsem wanem?
Long Wok Autim Tok. Ol nupela pablisa na ol pablisa i no save gut long autim tok ol i mas kisim skul long mekim gut dispela wok. Yumi inap lainim planti samting long pasin bilong ol strongpela pablisa long wok autim tok. (Lukim stori “Givim Bel Yet Long Autim Tok” long Wastaua, Februeri 15, 2015, aninit long liklik het tok “Helpim Ol Nupela Pablisa,” long paragraf 3.) Taim yu autim tok wantaim ol, dispela i helpim yu olsem wanem?
Yu ting yu inap singautim pablisa i save gut long autim tok long wok wantaim yu? Sapos dispela pablisa i sik o lapun, ating sampela taim yu ken kisim Baibel stadi bilong yu i go long haus bilong em na mekim stadi. Bihain long stadi, askim em long sampela gutpela tingting bilong helpim yu.
Lusim Haptaim Long Wok Wantaim Ol: Lusim sampela taim long wok wantaim ol dispela pablisa long autim tok na kisim save long ol. Singautim wanpela long insait long famili lotu bilong yupela na toktok wantaim em. Sapos em i sik o lapun, yu ting yu ken stretim rot na famili bilong yu i go long haus bilong em na mekim famili lotu? Askim em long olsem wanem em i kam insait long tok i tru. Wanem ol blesing em i bin kisim? Em i lukim wanem ol senis i bin kamap insait long kongrigesen? Wanem ol wok bilong Jehova em i amamas long insait long en?
Taim yu wok long kisim skul long ol, yu mas tingim tu olsem ol i no inap mekim gut olgeta samting. Wankain long yumi olgeta, ol pablisa i stap longpela taim long tok i tru ol i gat save long mekim gut ol narapela narapela hap wok bilong autim tok. (Rom 12:6-8) Ating sampela i lapun, na ol i no inap autim tok longpela taim wantaim yumi. Tasol yumi inap lainim planti samting long ol, long wanem, ol i bin stap gut long wok bilong Jehova inap planti yia.