Pilim Tru As Bilong Ol Samting i Kamap Long Nau
1 “Pasin bilong dispela graun i wok long senis senis.” (1 Ko 7:31, NW) Taim yumi lukim ol samting i wok long kamap long nau, yumi save dispela tok bilong Baibel i stret. Na taim yu lukim tu ol samting i wok long kamap insait long oganaisesen bilong Jehova, dispela samting i mekim wanem long yu?—Lu 21:28.
2 Yumi lukim truim bilong ol tok profet bilong Baibel, na yumi save yumi stap long pinis bilong dispela taim nogut bilong nau. (Mt 24:3-14; Lu 21:7-11) Jisas i tok, “taim ol manmeri bilong dispela taim i no i dai yet, dispela olgeta samting bai i kamap.” (Lu 21:32) Olsem wanem? Yu pilim tru ol samting bai painim ol manmeri long teritori bilong yu, em ol i no kam insait long lain bilong Jehova? Sapos yu pilim tru dispela samting, em bai kirapim yu long ting olsem wanem long wok autim tok?—Lu 21:34-36.
3 Long Dispela Hap Taim i Stap Yet Yumi Mas Wok Long Helpim Ol Man: Jisas i tokim ol disaipel bilong em, ol i gat hap taim yet long autim tok, na ol i mas mekim dispela wok. Em i tok: “Nau em i tulait yet, na yumi mas mekim wok bilong God, em i bin salim mi na mi kam. Tudak bai i kamap, na ol man bai i no inap mekim wanpela wok.” (Jo 9:4) Aposel Pol i mekim wankain tok long ol Kristen bilong Efesus, em i tok: “Nau yupela i gat taim bilong mekim pasin bilong God. . . . olsem na yupela i mas lukaut, nogut dispela taim i lus nating.”—Ef 5:16.
4 Sampela i bin tingim tok bilong aposel Pol, na ol i no lusim nating taim—ol i kirap mekim wok painia oltaim. Sampela yangpela, taim ol i stap yet long skul, ol i mekim wok painia oltaim, na gutpela samting i bin kamap long wok bilong ol. Ol yangpela long skul i ken tingting long helpim ol wanskul bilong ol long save long as bilong ol samting i wok long kamap long graun long nau, na ol i ken tokim ol long ol gutpela samting bai kamap taim Kingdom bilong God i bosim dispela graun.—Sav 12:1.
5 Olsem wanem yu inap mekim wok long Stori Bilong Mun? Taim yu gude pinis long man bilong haus, ating yu ken givim askim long em, olsem: “Yu ting wanem samting i as bilong ol samting i wok long kamap long nau na i mekim yumi bel hevi?” Taim man bilong haus i kamapim pinis tingting bilong em, nau yu ken tok: “Baibel i tok, planti man i pilim olsem i no gat as bilong i stap bilong ol. Lukim dispela tok i stap long Saveman 2:17. (Kaunim) Yu ting olsem wanem long dispela tok? (Larim man bilong haus i bekim tok.) Yu ting wanem samting inap mekim isi bel bilong man i gat planti hevi? (Larim man bilong haus i bekim tok.) Lukim dispela tok bilong Baibel, em i helpim yumi long save long wanpela gutpela samting. (Kaunim Buk Song 37:39, 40.) Long dispela as tasol na ol Witnes Bilong Jehova i laik lainim ol manmeri long tok bilong Baibel.” Na sapos man i laik harim tok, yu ken tokim em long kisim dispela samting yumi tilim long dispela mun, o yu ken tokim em long kisim wanpela magasin o wanpela liklik nius. Nius Kirap! i gutpela tru bilong helpim ol manmeri long pilim tru as bilong ol samting i kamap long graun long nau.
6 Tru tumas, em gutpela taim tru bilong mekim wok bilong Jehova. Gutpela sapos yumi tingim dispela samting, na mekim gutpela wok long ol hap taim bilong yumi long mun Janueri na helpim ol man i gat gutpela bel, na bai ol i ken save long as tru bilong ol samting i kamap long graun long nau.
[Ol Askim]
1. (a) Wanem ol samting i kamap na yumi save truim bilong tok bilong 1 Korin 7:31 i kamap long nau? (b) Olsem Luk 21:28 i tok, ol dispela samting i kirapim yumi long mekim wanem?
2. (a) Olsem wanem yumi save yumi stap long taim bilong pinis? (b) Sapos ol manmeri i laik winim dispela taim bilong pinis, ol i mas mekim wanem? (c) Dispela samting i mas kirapim yumi long ting olsem wanem long wok bilong yumi long autim tok?
3. Kaunim Jon 9:4 na Efesus 5:16. I gat wanem gutpela tok i stap long dispela tupela skripsa?
4. Planti brata sista i bin mekim wanem?
5. Olsem wanem yu inap mekim wok long Stori Bilong Mun?