Stori Long Ol Samting i Kamap Long Nau Bilong Kirapim Man Long Harim Tok
1 Olsem wanem? Yu laik kisim ol gutpela tingting i helpim yu long kamapim sampela nupela tok long wok autim tok na dispela i ken kirapim ol man long harim tok bilong Baibel yu autim long ol? Sapos olsem, orait stori long ol samting i wok long kamap long graun na long ples bilong yu bilong kirapim tok wantaim ol man. Yu inap stori long ol samting i kamap long nau long hap bilong yu, long kantri, o long olgeta hap. Ol dispela samting i wok long senis senis long olgeta taim. (1 Ko 7:31) Skelim ol tok i stap daunbilo.
2 Ol man i tingting planti long hevi bilong mani na long pe bilong ol samting. Olsem na yu ken tok:
◼ “Olsem wanem? Yu bin harim long nius olsem pe bilong [kolim nem bilong samting] i go antap?” O yu ken mekim sampela tok long planti man i no gat wok mani taim wanpela bikpela kampani i bin pinisim ol long wok. Tingim wanem tok yu laik kamapim bihain long dispela, na ating yu ken askim olsem, “Sampela taim yu bin tingting bilong wanem i hatwok tru long lukautim yumi yet long ol samting bilong skin?” o “Yu ting long olgeta taim bai i hatwok tru long kisim ol samting bilong lukautim yumi?”
3 Stori bilong ol pait, olsem bagarap i painim ol famili o pasin raskol i kamap long hap bilong yupela, em sampela samting yu ken stori long en. Yu ken askim olsem:
◼ “Yu bin kaunim long nius olsem [stori long wanpela hevi i bin kamap]?” Na yu ken askim olsem “Yu ting i gat wanem as na planti pait i wok long kamap long graun?” o “Yu ting wanpela taim bai kamap na yumi ken stap bel isi?”
4 Stori bilong ol bikpela tait, guria, na ol pait i save kamap long narapela narapela kantri, em ol sampela tok bilong kirapim ol man long harim tok. Ating yu ken askim olsem:
◼ “Yu ting God i as bilong [stori long wanpela bikpela bagarap i bin kamap]?” O yu ken stori long pait em nau tasol i kamap insait long wanpela kantri na tok: “Sapos olgeta man i laikim bel isi, orait olsem wanem na em i hatwok tru long kamapim bel isi?”
5 Putim gut yau long ol samting i kamap long nau, na mekim wok long ol dispela stori bilong kirapim tok wantaim ol man. Ol gutpela tok yumi ken mekim wok long en i stap long pes 12 long buk Toktok Gut, aninit long het-tok “Ol Samting i Kamap Long Nau.” Tasol yu no ken mekim sampela tok bilong helpim o daunim wok politik bilong wanpela lain o long ol samting i stret o i no stret long sindaun bilong ol man. Helpim ol man long save olsem tok bilong Baibel na Kingdom bilong God tasol em i rot bilong pinisim tru olgeta hevi bilong ol man.