Autim Tok Long Taim Ol Samting i Wok Long Senis Senis
1 Kwiktaim ol senis inap kamap! Wantu tasol, ol bikpela bagarap bilong win ren samting, hevi bilong mani, wok politik, o ol narapela bikpela hevi, ol inap kamap samting ol man i stori planti long en. Tasol, tingting bilong ol man tu inap senis hariap na i go long narapela samting. (Ap. 17:21; 1 Ko. 7:31) Long dispela taim bilong ol samting i wok long senis senis, olsem wanem yumi inap kirapim tru tingting bilong ol man na bai yumi inap autim tok bilong Kingdom long ol?
2 Kisim Save Long Ol Samting Ol Man i Tingting Planti Long En: Wanpela rot bilong kirapim tru tingting bilong ol man em long toktok long ol samting nau i kamap long graun. Bilong kirapim ol man long tingim gut i stap bilong ol long ai bilong God, wanpela taim Jisas i stori long ol samting i no longtaim em i bin kamap na i stap yet long tingting bilong ol man. (Lu. 13:1-5) Olsem tasol, taim yumi autim gutnius, yumi ken kolim sampela samting i kamap nau na ol man long teritori i tingting long en. Tasol yumi mas was gut taim yumi mekim olsem, na ol tok bilong yumi i no ken makim olsem yumi helpim wanpela lain politik o ol narapela samting.—Jo. 17:16.
3 Olsem wanem yumi inap save long ol samting em nau ol man i wok long tingting long en? Ating gutpela rot em long kamapim wanpela askim na putim yau long tok man i bekim. (Mt. 12:34) Pasin bilong tingim gut ol man bai kirapim yumi long harim tingting bilong ol, na long gutpela pasin kisim sampela save moa long ol. Ating wanpela hap tok man i mekim inap kamapim samting planti man long dispela hap i tingting planti long en, na dispela inap opim rot long yumi inap autim tok long ol.
4 Redim Tok Bilong Autim: Bilong redi long mekim wok autim tok long dispela taim bilong ol samting i wok long senis senis, yumi inap mekim wok long buk Toktok Gut. Sampela gutpela tok i stori long olsem wanem yumi inap autim tok na kamapim stori bilong ol samting nau i kamap long graun i stap long pes 12-13, aninit long het-tok “Ol Samting i Kamap Long Nau” na “Pasin Raskol/Stap Gutpela.” Yumi inap painim ol wankain tok olsem long Wok Kingdom bilong Septemba 2000, pes 6. Taim yu redim ol tok yu laik autim, redim tu ol skripsa i stret long tok yu mekim.
5 Taim tingting bilong ol man long teritori i senis, yumi tu i mas senisim kirap bilong tok bilong yumi na bai i stret long ol samting ol i tingting long en. Long dispela rot, yumi bai toktok wantaim ol man long ol samting ol i pilim tru long bel. Olsem na bai yumi inap long helpim planti man moa long kisim save long dispela Man em pasin na lo bilong em i no save senis.—Jems 1:17.