Autim Gutpela Tok—Autim Tok Long Ol Haus Long Kain Kain Pasin na Tok
1 Jehova i bin wokim planti kain kain samting. Man bilong raitim Song i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.” (Sng 104:24) Na i gat kain kain rot bilong autim tok tu, em samting Jehova i tok yumi mas mekim. Olsem wanem? Yu save autim tok long kain kain rot na dispela inap helpim planti man?
LONG DE BILONG TILIM MAGASIN
2 Sosaiti i kirapim olgeta brata sista long tilim magasin long olgeta Sarere. No ken mekim wok long Stori Bilong Dispela Mun, insait long 30 i go inap 60 sekon kamapim tok bilong wanpela stori na tilim tupela magasin long 50 toea. Sapos man bilong haus i kamapim sampela askim o em i laik save moa long sampela tok, yumi no ken hariap long go long narapela haus, nogat; toktok yet wantaim dispela man.
3 Long Wastaua na Kirap! i gat planti ol narapela narapela stori. Planti taim brata i mekim namba wan hap bilong Miting Bilong Wok Autim Tok i kamapim sampela gutpela tok yumi ken autim long ol nupela magasin. Putim gut yau; kwiktaim raitim ol dispela tok yu laik mekim wok long en long wanpela pepa. Taim ol i mekim wanpela soim long Miting Bilong Wok Autim Tok raitim long wanpela pepa olsem wanem ol i mekim dispela soim na mekim traim long en. Na bihain mekim wok long en long Sarere taim yu autim tok. Sapos yu pilim olsem ol man i no harim gut tok bilong yu, mekim wok long narapela stori. Long olgeta magasin i gat planti narapela narapela stori i gutpela bilong ol man i gat kain kain tingting. Sapos yu save gut long ol stori bilong tupela magasin, bai i no hatwok long yu long senisim tok bilong yu na man bilong haus i gat laik long harim.
MEKIM KAIN KAIN KIRAP BILONG TOK
4 Sampela taim Wok Kingdom Bilong Yumi i save senisim stori bilong mun. Taim yu skulim ol nupela pablisa, em i gutpela yu mekim wok long nupela stori bilong mun, na no ken mekim bikpela tok o planti tok. Tasol sampela taim i gutpela yu senisim tok bilong yu. Olsem wanem? Yu traim pinis long kirapim tok bilong yu wantaim wanpela liklik nius?
5 Long buk Reasoning i gat planti kirap bilong tok yu ken mekim wok long en. Olsem: Long pes 10-11 i gat ol kirap bilong tok i stori long ol samting i kamap long nau. Kisim save long ol samting i kamap long graun na tingim sampela skripsa i stori long dispela samting. Olsem wanem? Long teritori bilong yu ol i save autim tok planti taim long en? Sapos olsem i gutpela yu senisim kirap bilong tok bilong yu. Mekim wok long ol kirap bilong tok i stap long pes 15 bilong buk Reasoning. Na no ken lusim tingting, yu mas larim man bilong haus i kamapim tingting bilong em.
6 Ol man long teritori bilong yumi i gat kain kain sindaun. Yumi mas senisim tok bilong yumi bambai ol man i amamas long harim tok. Yumi mas mekim olsem, long wanem, yumi tingim tru narapela. (1 Ko 9:19-23) Autim tok long ol haus long kain kain pasin na tok na bai God “i kisim bek yu yet, na em bai i kisim bek ol manmeri i save harim tok bilong yu.”—1 Ti 4:16.