Go Bek Lukim Ol Man i Laik Harim Tok
1 Planti bilong yumi i bin tilim planti ol magasin na buklet. Bikpela samting em yumi mas go bek lukim ol man na wok long kirapim ol long kisim sampela save moa. Bilong mekim gut dispela wok, yumi mas redi gut pastaim.
2 Planti yangpela i save wari na tingting planti long ol wankain samting em ol man i bikpela pinis i tingting planti long en. Planti Kirap! i gat sampela stori long en i toktok long ol samting i kamap long nau, em ol yangpela i gat tingting long en. Ol dispela stori inap helpim ol yangpela, na papamama bilong ol tu, long save long wanem ol samting i bikpela samting long i stap bilong ol.
3 Sapos yu bin tilim “Kirap!” bilong Epril 8, orait, taim yu mekim gobek ating yu ken tilim “Kirap!” bilong Me 8. Yu ken mekim tok olsem:
◼ “Taim mi bin kam lukim yu, yu kisim wanpela nius i stori long pasin bilong katim marit. Nau long dispela taim ol yangpela i save go bikpela namel long planti hevi i save painim ol famili. Planti yangpela i bel hevi na mekim pasin bikhet bilong kamapim dispela hevi bilong ol. Tasol sampela yangpela ol i bihainim gutpela tingting na mekim stretpela pasin. Nupela Kirap! hia i stori long olsem wanem yumi ken bihainim stretpela pasin namel long ol man i save stil na pamuk. Mi ting bai yu amamas long kaunim.”
4 Sapos yu laik tilim buklet, yu ken mekim tok olsem:
◼ “Taim mi bin kam lukim yu, mi amamas long toktok liklik wantaim yu long wanem samting bai painim dispela graun long bihain. Sapos God i pinisim pasin nogut na pen na hevi, yu ting bai yumi inap kisim wanem kain sindaun? [Soim piksa long em i stap long pes 31 bilong buklet Yumi Stap Bilong Mekim Wanem—Yu Ken Save Olsem Wanem?] Long pes 29 na 30 i gat ol tok bilong Baibel i stori long ol gutpela samting em Kingdom bilong God bai kamapim. [Kaunim tok bilong wanpela skripsa olsem i stap long buklet.] Mi laik lusim dispela liklik buk long yu, pe bilong en em 30 toea tasol.”
5 Taim yu mekim gobek, ating man bilong haus bai tokim yu em i save kisim ol buk bilong lotu bilong em yet na em inap. Orait, yu ken mekim tok olsem:
◼ “Maski yumi bilong wanem lotu, pasin raskol na sik samting i putim hevi long yumi olgeta, a? [Larim man i bekim tok.] Yu ting i gat rot tru bilong stretim ol dispela hevi? [Kaunim 2 Pita 3:13.] Pes 2 bilong Wastaua i kamapim wok bilong ol nius bilong mipela. [Kaunim wanpela o tupela sentens yu ting i gutpela bilong kaunim.] Planti man i no Witnes Bilong Jehova ol i amamas long kaunim ol nius bilong mipela, long wanem, ol dispela nius, em Baibel i as bilong en, i kamapim rot tru bilong stretim ol hevi.” Sapos man bilong haus i mekim sampela tok i makim olsem em i amamas long harim tok, orait stori liklik long pasin bilong mekim Baibel-stadi.
6 Yu ken mekim wok long dispela tok, olsem:
◼ “Taim mi bin kam lukim yu, yumi bin toktok long ol samting bai kamap long dispela graun long bihain. Yu ting olsem wanem long dispela tok? [Kolim wanpela stori i bin kamap long nius na ol man i tingting planti long en.] Taim ol man i harim kain tok olsem, ol i tok, yumi stap long taim nogut tru. Mipela i bilip ol dispela samting i makim olsem yumi stap long ‘taim bilong las de,’ em Baibel long 2 Timoti 3:1-5 i stori long en.” Kaunim sampela hap bilong ol dispela ves, na nau yu ken askim man, em i ting dispela tok i makim ol man long nau. Nau stori long ol tok i stap aninit long wanpela het-tok long pes 234-238 bilong buk Reasoning o ol tok bilong “Laspela Taim” long pes 18-19 bilong liklik buk Sampela Tok Bilong Baibel Bilong Toktok Wantaim Man Long En.
7 Sapos yumi redim gut ol tok na yumi kamapim klia olsem yumi laik tru long helpim man, orait, yumi ken bilip olsem ol man i gat gutpela bel ol bai harim tok.—Jo 10:27, 28.
[Ol Askim]
1. Bilong mekim gut gobek, yumi mas mekim wanem?
2. Olsem wanem magasin Kirap! inap helpim ol yangpela?
5. Sapos man i tok em i save kisim ol buk bilong lotu bilong em yet na em inap, yu ken mekim wanem tok long em?
6. Taim yumi autim tok, olsem wanem yumi ken mekim wok long wanpela stori i bin kamap long nius?