Tingim Tru Olgeta Man i Bin Harim Tok
1 Klostu nau wok bilong autim tok bilong Kingdom long olgeta hap em bai pinis, na bihain long en “ol man i no laik save long God” ol bai bagarap. (2 Te 1:7-9) Olsem na pasin bilong tingim tru laip bilong ol narapela i kirapim ol lain bilong Jehova long autim tok bilong Kingdom long planti manmeri moa.—Sef 2:3.
2 Long olgeta mun, ol Witnes i save lusim planti milion aua bilong painim ol man i laik harim “gutpela tok bilong samting i gutpela moa.” (Ais 52:7, NW) Yumi bin tilim sabskripsen bilong Wastaua o buklet God i Laik Yumi Mas Mekim Wanem? na sampela manmeri i bin kisim. Sapos yumi tingim tru ol dispela man, dispela i mas kirapim yumi long i go bek long olgeta man i bin harim tok.—Snd 3:27.
3 Raitim Gut Olgeta Samting Long Notbuk: Sapos yu raitim gut olgeta samting bilong ol man i harim tok na ol samting yu tilim, bai yu helpim planti man moa. Raitim nem na atres bilong man, de na taim yu bungim em, buk samting yu tilim, na stori yu mekim, ol dispela bai helpim yu long mekim gutpela wok taim yu go bek. Na tu, sapos yu raitim sampela tok em i bin mekim long namba wan taim, bai yu inap kamapim gen dispela tok taim yu go bek.
4 Mekim Hariap Ol Gobek: Yu bin traim long go lukim hamas bilong ol man yu tilim ol buk samting long ol long mun i go pinis? Sampela wik i lus na yu no bin go lukim ol? Sapos yu tingim tru i stap bilong ol man long bihain, dispela i mas kirapim yu long go bek hariap bilong lukim ol, ating insait long sampela de tasol, na bai ol i tingim yet ol tok yupela i bin mekim. Taim yu go bek hariap bilong helpim ol, ating bai yu inap pasim rot bilong Satan long “kam na rausim dispela tok God i bin planim long bel bilong ol.”—Mk 4:15.
5 Redi Gut Em Bikpela Samting: Bilong mekim gut ol gobek, yu mas redi gut. Paslain long yu go, tingim gut ol tok yu laik mekim. Laspela pes long Wok Kingdom bilong Epril 1997 i kamapim sampela gutpela pasin bilong toktok wantaim ol man, bilong tilim ol magasin o buklet Yumi Mas Mekim Wanem? Narapela samting yu mas mekim, em yu mas tingim sampela tok yu laik stori wantaim man long en taim yu go bek. Yu ken mekim wanem tok taim yu go bek lukim man i harim tok? Olsem wanem yu ken kirapim wanpela Baibel-stadi?
6 Taim yu go bek lukim man yu bin stori wantaim em long wanem samting inap klinim dispela graun na em bai kamap wanpela gutpela ples bilong i stap long en, yu ken tok olsem:
◼ “Taim mi kam lukim yu bipo, yumi bin tok olsem, sampela bikpela senis i mas kamap na bai dispela graun i ken kamap Paradais na ol man i ken i stap bel isi long en. Yu ting ol man inap mekim dispela wok? [Larim man i bekim tok.] Orait, bilong wanem God i mas pinisim ol wok nogut bilong ol man? Plis lukim dispela tok.” Kaunim Song 37:38. Nau opim buklet Yumi Mas Mekim Wanem? long Stadi 5, na mekim wok long sampela tok bilong paragraf 4 na 5 bilong soim olsem wanem God bai truim dispela tok profet. Stori moa na tokim em olsem yu laik mekim Baibel-stadi wantaim em long dispela buklet.
7 Sapos yu bin stori long Kingdom bilong God na tilim buklet “Yumi Mas Mekim Wanem?” long namba wan taim, orait taim yu go bek yu ken mekim kain tok olsem:
◼ “Taim mitupela i toktok bipo, yumi bin tok olsem Kingdom bilong God em i wanpela gavman tru na em bai bosim olgeta hap bilong graun. Baibel i tok olsem Krais Jisas bai bosim dispela graun. Inap yu tingim sampela gutpela samting bai kamap long rot bilong dispela kain gavman na bos bilong en?” Larim man i bekim tok. Opim buklet Yumi Mas Mekim Wanem? long Stadi 6. Mekim wok long sampela tok bilong paragraf 6 na 7 na long piksa long pes 13, stori long ol samting Kingdom bilong God bai mekim long ol manmeri long bihain. Kaunim Daniel 2:44, na sapos i stret, tilim buk Save long K1.50 na stori long pasin bilong yumi long mekim ol Baibel-stadi.
8 Sapos yu bin painim wanpela man i tok olsem ol lotu bilong graun i kamapim ol hevi i painim ol manmeri, ating yu ken mekim dispela askim taim yu go bek:
◼ “Olsem wanem? Yu bin tingting long olsem wanem yumi ken save God i orait long wanem lotu? [Larim man i bekim tok.] Dispela buklet God i Laik Yumi Mas Mekim Wanem? em i stori long ol mak bilong trupela lotu.” Opim long Stadi 13, na kamapim klia 5-pela mak olsem i stap long paragraf 3-7 em ol i raitim long rait italik. Yu ken stori moa olsem: “Yumi mas painim trupela lotu, na tu, yumi mas save long ol samting God i laik bai yumi wan wan i mas mekim.” Kaunim Jon 4:23, 24. Tokim em yu laik stori moa long dispela. Givim wanpela buklet long man bilong haus, opim long Stadi 1, na soim em long pasin bilong mekim stadi. Tokim man, em inap kisim buklet long 40 toea tasol, na stretim tok wantaim em bilong kam bek long wanpela taim i stret bilong stori moa long sampela tok bilong buklet.
9 Taim yu go bek bilong stori moa long olsem wanem famili i ken i stap amamas, yu ken mekim tok i kain olsem dispela:
◼ “Taim mitupela i bung long namba wan taim, mi bin toktok wantaim yu long rot tru bilong ol famili i ken i stap amamas, em ol i mas bihainim ol tok i stap long Baibel. Sapos yumi laik helpim ol famili long nau, yu ting olsem tok bilong Baibel em i bilong helpim ol man bilong bipo tasol o yu ting em inap helpim ol man long nau tu?” Larim man i bekim tok. Givim wanpela buk Save long man. Opim long sapta 2 na kaunim tok bilong wanpela tisa i stap long paragraf 13. Mekim wok long ol tok bilong paragraf 3, na tokim em yu laik mekim Baibel-stadi wantaim famili bilong em. Stori long em olsem, stadi i no gat pe, na pe bilong buk em K1.50 tasol.
10 Sapos yumi raitim gut olgeta samting long notbuk, na yumi redi gut pastaim, na go bek hariap bilong helpim ol, orait bai yumi kamapim klia pasin bilong laikim ol narapela man na dispela bai helpim ol long kam long rot bilong kisim laip.—Mt 22:39; Ga 6:10.