Go Bek Lukim Ol Man i Kisim Magasin o Buklet
1 Jisas i kirapim lain bilong em long ol i mas wok long kamapim ol disaipel. (Mt 28:19) Olsem na no ken tilim ol magasin samting na em tasol, nogat; yumi laik helpim ol man long kamap strong long ol samting bilong spirit. Bilong mekim olsem, yumi mas go bek lukim ol man i laik harim tok na bai yumi inap helpim ol moa.
2 Sapos long taim yu autim tok long man long namba wan taim yu bin kamapim wanpela stori long magasin, orait taim yu go bek lukim em gen, gutpela sapos yu stori moa long dispela tok yu bin kamapim:
◼ “Taim mi lukim yu bipo, yumi bin toktok long wanpela stori long Wastaua (o Kirap!) em i helpim yumi long save bilong wanem yumi mas kisim save long ol tok bilong Baibel. God bai helpim ol man long kisim gutpela sindaun long rot bilong Kingdom, em gavman bilong em. Long Maika 4:3, 4 God i tok promis olsem dispela Kingdom bai pinisim olgeta pait.” Kaunim skripsa pinis, na nau soim piksa long em i stap long skin bilong buklet “Harim!” Stori long namba wan paragraf na ol skripsa bilong en, em Maika 4:3, 4 i wanpela bilong ol dispela skripsa. Stretim rot bilong i go bek lukim em na bai yu inap stori moa wantaim em long ol tok bilong paragraf 2.
3 Sapos man bilong haus i no gat bikpela laik tumas long harim tok o em i no gat hap taim bilong toktok, ating yu ken kisim ol nupela magasin i go long em long olgeta taim:
◼ “Taim mi lukim yu bipo yu amamas long kisim ol nius, olsem na mi ting bai yu amamas long kisim ol nupela. Ating bai yu laikim dispela stori.” Soim wanpela stori long em yu ting em bai laikim. Orait nau yu ken tok: “Tupela nius hia yu ken kisim long 50 toea tasol.” Na tokim em bai yu amamas long bringim ol nupela nius i kam long em.
4 Sapos man bilong haus i bin kaunim ol magasin na em i kamapim tok i makim olsem em i laikim ol magasin, orait, tokim em long kisim sabskripsen:
◼ “Mi save yu laikim ol tok bilong Wastaua na mi bin amamas long bringim ol nupela magasin i kam long yu. Sapos yu laik, mi ken stretim rot na bai yu ken kisim Wastaua long rot bilong posofis. Long dispela rot bai yu inap kisim ol nupela nupela magasin na bai yu no lus long wanpela.” Sapos em i laik kisim, yu ken tok: “Pe bilong sabskripsen, em K6.00.”
5 Sapos man i bin kisim wanpela buklet, tasol yu no bin soim em long pasin bilong mekim stadi, orait tingting long mekim olsem long taim yu go bek lukim em.
Olsem: Sapos man bilong haus i kisim buklet “Gavman,” tokim em long kisim buklet bilong em i kam, na yu ken tok:
◼ “Lukim dispela tok i stap long pes 3 i stori long bikpela tok Jisas i bin autim taim em i stap long graun.” Kaunim paragraf wan. Tokim em long kaunim paragraf 2 na 3, na askim em, em i mas mekim wanem sapos em i laik kisim sampela save moa. Orait nau yu ken tok: “Em bikpela samting long yumi mas save bilong wanem Kingdom bilong God i mas i kam. Mi laik kam bek na stori moa long olsem wanem gavman bilong God tasol inap helpim yumi ol man long kisim gutpela sindaun.”
6 Yumi gat planti buklet i stori long kain kain samting. Painim sampela gutpela tok long ol buklet yu laik tilim. Dispela bai helpim yu long kirapim ol man i gat gutpela bel long kisim sampela save moa long ol samting Jisas i tok yumi mas mekim.—Mt 28:20.