Amamas Long Go Bek Lukim Man i Laik Harim Tok na Helpim Em
1 Olgeta brata sista i autim tok long ol haus ol i laik helpim ol man i gat laik long harim tok. Sapos yumi mekim olsem bai yumi kisim amamas na stap belgut. (Lukim Song 126:5, 6.) Bilong mekim olsem, yumi mas redi gut pastaim.
2 Bilong redi, yumi mas raitim sampela tok long wanpela hap pepa o notbuk. Raitim ol samting yu bin toktok wantaim man long en long namba wan taim yu bin autim tok long em, na raitim sampela tok em man bilong haus i bin mekim. Na ating yu laik raitim tok long ol samting yu laik mekim bilong kirapim tok taim yu go bek lukim em.
3 Taim yu autim tok long man long namba wan taim, sapos yu bin stori long Beten Bilong Bikpela na yu bin tilim buklet “Gavman,” orait yu ken mekim tok olsem:
◼ “Taim mi lukim yu bipo, yumi bin toktok long olsem wanem God bai kamapim laik bilong em long graun na olgeta man bai stap bel isi long sindaun bilong ol. Plis lukim ol tok i stap long pes 29 long dispela buklet mi givim long yu, em i stori long sampela gutpela samting moa Kingdom bilong God bai mekim bilong helpim ol man.”
4 Sapos man i no bilip tumas long God, orait yu ken mekim tok olsem:
◼ “Taim mi lukim yu bipo, yumi bin stori long Hibru 3:4 i kamapim wanpela as na yumi ken save, wanpela Man i gat tingting em i bin wokim olgeta samting.” Kaunim gen dispela skripsa na opim buklet Tru God i Save Tingim Yumi? long pes 4-9 na skruim sampela tok moa long ol tok yu bin mekim bipo. Kamapim askim na kaunim paragraf na larim man bilong haus i bekim tok. Sapos yu ting i orait long mekim, orait, tokim em long kisim buklet bilong em na bai yu ken toktok wantaim em long sampela tok bilong en.
5 Taim yu lukim man long namba wan taim, sapos i olsem em i amamas long sindaun bilong em, olsem em i no sot long wanpela samting bilong skin, orait yu ken kamapim gen sampela tok long liklik nius Ol Man Bilong Graun Bai Abrusim Bagarap o Nogat? na kaunim ol tok i stap long pes 6. Askim em, em i laik stap long wanpela naispela paradais long graun? Sapos yu laik save, em i laik tru long harim tok o nogat, orait soim wanpela gutpela piksa long em o kamapim sampela tok long magasin yu bin mekim wok long en na askim em long kamapim tingting bilong em long dispela.
6 Sapos yu bin toktok long wanpela stori long Wastaua o Kirap!, orait yu ken bihainim wankain pasin olsem yumi kolim pinis. Kamapim gen stori bilong magasin yu bin toktok long en long namba wan taim yu bin autim tok long man, na nau toktok liklik long narapela tok i stap long dispela stori o long wanpela stori i stap long narapela Wastaua o Kirap! yu holim. Sapos inap, kaunim wanpela skripsa na askim em long kamapim tingting bilong em long dispela samting. Orait nau yu ken tilim sabskripsen bilong Wastaua o Kirap! long em.
7 No ken lusim tingting long winim mak yu bin putim bilong kirapim Baibel-stadi. Ating yu mas i go bek tupela o 3-pela taim samting bilong kirapim tingting bilong man na bai em i gat laik long stadi. Yu mas i go bek kwik na lukim em na bai man i ken save, yu tingim em.
8 Tok bilong Kingdom yumi autim i mekim man i amamas tru. (Lu 2:10) Taim man i kirap long bilipim ol tok bilong yumi, yumi amamas moa yet. (Fl 4:1) Olsem na gutpela sapos yumi go bek lukim ol man i laik harim tok na bai yumi inap kisim dispela amamas.
[Ol Askim]
1. Sapos yumi helpim ol man i laik harim tok, bai yumi kisim wanem samting?
2. Bilong redi long mekim gut ol gobek yu ken mekim wanem?
6. Sapos man bilong haus i bin kisim wanpela magasin long yu, yu ken mekim wanem tok taim yu go bek lukim em?
7. Taim yu mekim gobek yu laik mekim wanem?