Yu Soim Pinis Pasin Bilong Stadi Taim Yu Bungim Man Long Namba Wan Taim?
Taim yumi laik kirapim stadi wantaim ol man bilong haus, sampela bilong ol i save tok olsem ol i no laik stadi o ol i save stadi long Baibel long haus lotu bilong ol yet. Tasol ol i no save olsem pasin bilong yumi long stadi long Baibel i narapela kain long ol narapela lotu, na ol i no save olsem dispela inap givim bikpela amamas long ol. Olsem na maski long tokim tasol man olsem yu laik stadi wantaim em, mobeta yu lusim sampela minit bilong soim em pasin bilong stadi long Baibel long namba wan taim yu bungim em. Tingim dispela tok piksa: No ken tokim tasol man olsem yu save gut long kuk na bihain yu bai karim kaikai i kam, nogat, yu mas givim sampela kaikai long em nau tasol! Yu ken mekim olsem insait long sampela minit tasol, bihainim tok i stap long pes 8 long Wok Kingdom bilong Februeri 2006.
“Yu ting i gat wanpela taim bihain bai kamap na ol dispela tok hia bai kamap tru? [Ritim Aisaia 33:24, na larim man i bekim tok.] Mi laik soim yu sampela gutpela tok i stori long dispela samting.” Givim buk Baibel i Tok long man bilong haus na tokim em long opim buk long pes 36 na lukim paragraf 22. Ritim askim i stap daunbilo long pes, na tokim man bilong haus long painim bekim bilong askim taim yu wok long ritim paragraf. Na bihain ritim askim gen, na harim bekim bilong em. Ritim narapela skripsa i stap wantaim. Mekim wanpela askim em yu bai bekim taim yu kam bek, na makim de na taim stret yu bai go bek lukim em. Em nau, yu kirapim pinis wanpela Baibel stadi!