Ol Lain Bilong Autim Tok i Mas Beten
1. Bilong mekim wok autim tok, yumi mas mekim wanem?
1 Yumi no inap mekim wok autim tok long strong bilong yumi yet. Jehova i givim strong long yumi bilong mekim wok. (Fl. 4:13) Em i mekim wok long ol ensel bilong em long helpim yumi long painim ol man i olsem sipsip. (KTH 14:6, 7) Pikinini kaikai bilong tok i tru yumi planim na givim wara long en, Jehova yet i mekim i kamap bikpela. (1 Ko. 3:6, 9) Em i bikpela samting long ol lain bilong autim tok i mas beten na bilip long Papa bilong yumi long heven!
2. Yumi ken beten long wanem ol samting?
2 Bilong Helpim Yumi Yet: Yumi mas beten long olgeta taim yumi autim tok. (Ef. 6:18) Yumi ken beten long wanem ol samting? Yumi ken beten bilong holim stretpela tingting long teritori na bilong yumi no ken pret. (Ap. 4:29) Yumi ken askim Jehova long stiaim yumi i go long ol man i gat gutpela bel em yumi inap stadi wantaim ol. Sapos man bilong haus i givim askim long yumi, orait yumi ken mekim sotpela beten long tingting, na askim Jehova long helpim yumi long bekim gut. (Neh. 2:4) Yumi ken askim tu long kisim gutpela tingting na save bambai yumi ken putim wok bilong autim tok i stap namba wan. (Jem. 1:5) Jehova i amamas taim yumi beten na tok tenkyu long em long gutpela wok yumi inap mekim bilong i stap wokman bilong em.—Kl. 3:15.
3. Olsem wanem pasin bilong beten bilong helpim ol narapela i helpim wok autim tok i go bikpela?
3 Bilong Helpim Ol Narapela: Yumi “mas prea long God i helpim ol arapela,” na yumi ken kolim tu nem bilong ol wanbilip, taim i stret long mekim olsem. (Jem. 5:16; Ap. 12:5) Olsem wanem? Helt bilong yu i mekim na yu no inap mekim bikpela wok bilong autim tok? Orait, Beten askim Jehova long helpim ol wanbilip em ol i gat gutpela helt. Tingim, ol beten bilong yu inap helpim tru ol narapela! I stret tu long yumi beten long ol bikman bilong gavman i ken orait long wok bilong yumi long autim tok, na bai ol brata bilong yumi i “ken sindaun gut na i stap bel isi.”—1 Ti. 2:1, 2.
4. Bilong wanem yumi mas beten oltaim?
4 Wok bilong autim gutnius i wanpela bikpela wok tru. Sapos yumi “beten long olgeta taim,” yumi bai inapim tru dispela wok wantaim helpim bilong Jehova.—Ro. 12:12.