“Stretpela Pasin Man i Mekim i Kamapim Ples Klia Olsem Em i Gat Savetingting”
1. Sampela man i gat wanem kain tingting long wok bilong yumi?
1 Ating sampela taim ol man bilong haus i no amamas long yumi, long wanem, ol i gat tingting kranki long yumi o ol i harim tok giaman em sampela i mekim long ol Witnes Bilong Jehova. Ating ol nius ripot i sutim tok giaman long yumi na dispela i stiaim tingting bilong ol. Long sampela kantri ol i kolim yumi olsem wanpela lotu nogut. Yumi mas mekim wanem taim ol man i mekim kain tok olsem long yumi?
2. Taim ol man i sutim tok giaman long yumi, wanem samting bai helpim yumi na yumi no bel hevi?
2 Holim Stretpela Tingting: Long taim bilong ol aposel, planti man i gat tingting kranki long Jisas na ol narapela wokboi bilong Jehova na ol i sutim tok giaman long ol. (Ap. 28:22) Tasol ol i no larim dispela kain tok i mekim na ol i sem long mekim wok autim tok. Jisas i tok: “Stretpela pasin man i mekim i kamapim ples klia olsem em i gat savetingting.” (Mt. 11:18, 19, NW ) Em i wok strong yet long mekim laik bilong Papa bilong em, em i save olsem ol man i laik save long tok i tru, ol bai luksave olsem gutnius i helpim ol tru. Taim yumi tingim olsem ol man i bin sutim tok giaman long Pikinini bilong God yet, bai yumi no bel hevi taim ol i mekim olsem long yumi.
3. Bilong wanem yumi no ken kirap nogut long ol man i birua na sutim tok giaman long yumi?
3 Jisas i tok olsem ol man bilong graun bai birua long ol disaipel bilong em, olsem ol i bin birua long em. (Jo. 15:18-20) Olsem na yumi no ken kirap nogut long ol man i birua na sutim tok giaman long yumi. Yumi mas save olsem dispela pasin bai i go bikpela moa taim yumi wok long i go klostu long pinis bilong taim bilong las de na belhat bilong Satan i go bikpela moa. (KTH 12:12) Yumi ken amamas, long wanem, dispela i makim olsem klostu nau graun bilong Satan bai pinis.
4. Sapos man i kros na i no laik harim gutnius, orait yumi mas mekim wanem?
4 Bekim Tok Long Gutpela Pasin: Taim ol man i kros long yumi, oltaim yumi mas bekim tok isi na mekim gutpela tok long ol. (Snd. 15:1; Kl. 4:5, 6) Sapos inap, yumi ken tokim man bilong haus olsem i gat planti tok giaman ol man i mekim long ol Witnes Bilong Jehova, o yumi ken askim em bilong wanem em i gat dispela kain tingting. Tok isi bilong yumi inap kirapim man long skelim tok ol man i mekim long ol Witnes Bilong Jehova na long putim yau long tok bilong ol Witnes taim ol i kam long haus bilong em long narapela taim. Tasol sapos man bilong haus i belhat nogut tru, ating mobeta yumi lusim em long gutpela pasin. Yumi ken save tru olsem maski ol man i gat wanem kain tingting long yumi, Jehova i amamas long wok yumi mekim.—Ais. 52:7.