Wanpela Wok i Givim Bikpela Amamas
1. Wanem wok long nau i helpim ol man?
1 Ol man i bin amamas tru taim ol i lukim Jisas i oraitim ol sikman. (Luk 5:24-26) Long nau, yumi amamas long insait long wok bilong helpim ol man long kisim save long Jehova. (Rev. 22:1, 2, 17) Yumi save amamas long ritim ol ekspiriens i stori long olsem wanem tok bilong Jehova na holi spirit i helpim ol man long senisim laip bilong ol. Tasol yumi kisim bikpela amamas moa taim yumi insait long wok bilong stadi wantaim ol man long Baibel na helpim ol long kamap strong.
2. Yumi pilim olsem wanem taim yumi wok long skulim wanpela long tok i tru?
2 Wanem nem bilong God? Bilong wanem God i larim pen na hevi i stap? Kingdom Bilong God bai mekim wanem bilong helpim ol man? Yumi save amamas long bekim ol dispela askim, na tu, yumi save amamas long lukim pes bilong sumatin i lait taim em i lainim tok i tru. (Snd. 15:23; Luk 24:32) Taim sumatin i wok long kamap strong, ating em bai kirap mekim wok long nem bilong Jehova, senisim pasin bilong em long bilas, i no moa insait long ol pasin nogut inap bagarapim em, na em i kirap long autim tok long ol narapela. Sapos em i wok strong i go inap em i dediket long God na kisim baptais, em bai kamap wanpela brata na wanwok bilong yumi. Olgeta wan wan samting em i mekim bilong kamap strong i as na yumi ken amamas.—1 Tes. 2:19, 20.
3. Yumi ken mekim wanem bilong kirapim Baibel stadi?
3 Yu Inap Insait Long Dispela Wok? Sapos yu laik insait long dispela wok i gat amamas bilong en, beten askim Jehova long opim rot long yu ken kisim wanpela Baibel stadi, na mekim ol samting i stret wantaim beten bilong yu. (1 Jon 5:14) Autim tok long ples na taim we yumi inap painim ol man. Taim rot op yu ken tokim man olsem yu laik stadi wantaim em long Baibel. (Sav. 11:6) Taim yu bungim man i gat laik long kisim save na yu planim pikinini kaikai bilong tok i tru, yu mas i go bek na givim wara long en.—1 Kor. 3:6-9.
4. Bilong wanem yumi mas tokim ol man olsem yumi laik stadi wantaim ol long Baibel?
4 I gat planti tausen manmeri i laik tru long bihainim stretpela pasin. Husat bai helpim ol long inapim dispela laik bilong ol long kisim ol samting bilong spirit long rot bilong stadi wantaim ol long Baibel? (Mat. 5:3, 6) Yumi mas amamas long givim yumi yet long helpim dispela wok bilong autim tok na kamapim ol disaipel paslain long wok bilong bungim kaikai i pinis.—Ais. 6:8.