Wok Autim Tok—No Ken Les Kwik
1. Olsem wanem Jehova i soim olsem em i no les kwik long ol man?
1 God i no save les kwik long ol man. (Kis. 34:6; Sng. 106:41-45; 2 Pita 3:9) Wok bilong autim tok bilong Kingdom long olgeta hap i kamapim klia tru olsem em i no les kwik long ol man, na klostu 2,000 yia nau, em i wok yet long kirapim ol man i gat gutpela bel long i kam long em. (Jon 6:44) Olsem wanem yumi ken bihainim pasin bilong Jehova long i no les kwik taim yumi autim tok?
2. Olsem wanem yumi ken soim olsem yumi no les kwik taim yumi autim tok?
2 Autim Tok Long Ol Haus: Taim yumi autim tok na ol man i no laik harim tok na yumi “no lusim” dispela wok, yumi bihainim pasin bilong Jehova long i no les kwik. (Apo. 5:42) Maski ol man i no laik harim tok, o ol i tok bilas o birua long yumi, yumi sanap strong na autim tok yet. (Mak 13:12, 13) Taim yumi wok yet long helpim ol man i laik harim tok, maski sampela taim i hatwok long painim ol, yumi kamapim klia olsem yumi no les kwik.
3. Bilong wanem yumi mas i gat pasin bilong i no les kwik taim yumi mekim gobek na Baibel stadi?
3 Baibel Sumatin: Taim yumi planim kaikai long gaden, yumi mas i gat pasin bilong i no les kwik. Yumi inap lukautim kaikai, tasol yumi no inap subim em long gro hariap. (Jems 5:7) Olsem tasol, isi isi man i save kamap strong long ol samting bilong spirit. (Mak 4:28) Ol Baibel sumatin inap pilim hatwok long lusim ol bilip giaman o ol kastam em Baibel i no as bilong en. Yumi no ken subim ol long mekim ol senis. Pasin bilong i no les kwik bai opim rot long holi spirit i ken kirapim laik bilong ol sumatin long mekim ol senis.—1 Kor. 3:6, 7.
4. Olsem wanem pasin bilong i no les kwik inap helpim yumi long autim tok long ol wanblut i no Witnes?
4 Ol Wanblut i No Witnes: Yumi gat bikpela laik long ol wanblut i mas kisim save long tok i tru, tasol yumi no ken les kwik. Yumi mas wet long taim i stret long tokim ol long bilip bilong yumi, na taim yumi mekim olsem, yumi no ken stori long planti samting tumas, nogut dispela i mekim na ol i les long harim. (Sav. 3:1, 7) Pasin bilong yumi i mas stap olsem gutpela witnes long ol, na yumi mas redi long kamapim bilip bilong yumi long pasin isi na pasin rispek. (1 Pita 3:1, 15) Yes, sapos yumi gat pasin bilong i no les kwik, wok autim tok bilong yumi bai karim gutpela kaikai na dispela bai amamasim Papa bilong yumi long heven.