Yumi Mas “Sori Tru” Long Ol Man

1. Long nau ol manmeri i nidim tru wanem samting?

¹ Long nau ol man i gat bikpela nid tru winim olgeta taim bipo, ol i nidim narapela long mekim pasin sori long ol. Ol hevi bilong dispela graun i go nogut moa, na i mekim na planti milion manmeri i stap bel hevi. Ol i mas kisim helpim, olsem na yumi ol Kristen i mas helpim ol, long wanem, yumi gat ol samting we i mekim na yumi inap tru long soim pasin sori long ol. (Mat. 22:39; Gal. 6:10) Yumi ken helpim ol olsem wanem?

2. Wanem nambawan gutpela rot bilong soim pasin sori?

² Wok i Kamapim Pasin Sori: God wanpela tasol em inap long mekim gut bel bilong olgeta manmeri. (2 Kor. 1:​3, 4) Jehova i kirapim yumi long bihainim pasin bilong em na “sori tru” long ol narapela, na em i givim wok long yumi mas tokim ol narapela long gutnius bilong Kingdom. (1 Pita 3:⁠8) Pasin bilong givim bel tru long mekim dispela wok em i nambawan gutpela rot bilong mekim gut bel bilong “ol man i stap wantaim bikpela wari,” long wanem, Kingdom Bilong God tasol bai pinisim olgeta hevi bilong ol man. (Ais. 61:⁠1) Jehova i sori long lain bilong em, olsem na klostu nau em bai pinisim tru olgeta pasin nogut na kamapim nupela taim i gat stretpela pasin tasol long en.​—⁠2 Pita 3:⁠13.

3. Olsem wanem yumi ken bihainim pasin bilong Jisas long tingim ol man?

³ Tingim Ol Man Olsem Jisas i Bin Mekim: Jisas i tingim olgeta wan wan man taim em i autim tok long bikpela lain manmeri i bung. Em i luksave olsem ol i no gat wasman bilong helpim ol long pas gut wantaim God. Jisas i sori tru long ol na dispela i kirapim em long skulim ol. (Mak 6:34) Sapos yumi tingim ol narapela olsem Jisas i mekim, dispela bai kirapim yumi long mekim pasin sori long olgeta wan wan man. Taim yumi autim tok, krai bilong nek na pes bilong yumi bai kamapim klia pasin sori bilong yumi. Na wok autim tok bai stap namba wan samting long laip bilong yumi, na yumi bai senisim tok yumi laik autim na bai i stret long ol kain kain man yumi bungim.​—⁠1 Kor. 9:​19-23.

4. Bilong wanem yumi mas kamapim pasin sori?

⁴ Bikpela lain manmeri bilong olgeta kantri i putim yau long tok bilong Kingdom na ol i amamas long yumi tingim ol. Taim yumi kamapim pasin sori, yumi bai givim biknem long God Jehova na mekim em i amamas.​—⁠Kol. 3:⁠12.