‘Nem Bilong God i Mas i Stap Holi’
1. Wanem tim bilong kibung sekit bilong 2012? Wanem skripsa i as bilong dispela tim?
1 Em i gutpela samting tru long yumi holim nem bilong King Bilong Heven na Graun, em Jehova! God yet i givim nem bilong em long yumi, na kirap long 1931, yumi kisim dispela nem Ol Witnes Bilong Jehova, na ol man i save olsem yumi lain i holim nem bilong Jehova. (Ais. 43:10) Pikinini bilong God, em Jisas, i tingim nem bilong God i bikpela samting, olsem na namba 1 samting em i kolim long beten bilong em, em nem bilong God. (Mat. 6:9) Tok bilong Jisas i as bilong tim bilong kibung sekit bilong 2012, em “Nem Bilong God i Mas i Stap Holi.”
2. Bai yumi amamas long harim wanem ol gutpela tok?
2 Ol Tok Bai Kamap: Dispela tok “Autim Nem Bilong God Long Rot Bilong Mekim Wok Olsem Fultaim Sevan” bai kamap long Sarere, na em bai stori long as na ol manmeri i mekim wok bilong God fultaim ol i kisim amamas long dispela wok. Na tu, bai yumi harim wanpela tok i gat fopela hap: “Lukaut Long Pasin Bilong Nogutim Nem Bilong Jehova,” dispela tok bai helpim yumi long abrusim 4-pela samting em ol inap kalabusim yumi. Dispela tok “As na God i Mas Mekim Nem Bilong Em i Stap Holi,” bai bekim ol dispela askim, Wanem samting bai helpim yumi long givim bel long autim tok taim ol man i les long harim tok? na, Wanem samting bai helpim yumi long mekim gutpela wok moa bilong autim tok? Long Sande bai yumi harim wanpela tok i gat 4-pela hap i stori long olsem wanem yumi inap mekim holi nem bilong God long rot bilong ol tingting bilong yumi, toktok bilong yumi, ol disisen bilong yumi, na pasin bilong yumi. Ol nupela man husat i kam long kibung bai amamas long harim dispela pablik tok, em “Jehova Bai Mekim Holi Biknem Bilong Em Long Armagedon.”
3. Yumi gat wanem gutpela wok? Dispela kibung bai helpim yumi olsem wanem?
3 Klostu nau Jehova bai mekim nem bilong em i stap holi. (Ese. 36:23) Tasol long nau, yumi gat gutpela wok bilong mekim olgeta samting em nem holi bilong Jehova i makim. Yumi save olsem dispela kibung sekit bai helpim yumi long inapim bikpela wok yumi gat olsem lain i holim nem bilong God.