Tokim Ol Man Long Nem Bilong God
1 Yu bin mekim wanem taim yu kisim save long nem bilong God long namba wan taim? Planti man ol i mekim pasin i wankain olsem wanpela meri, em i tok: “Long namba wan taim mi lukim nem bilong God long Baibel, mi krai. Dispela save i kirapim tru bel bilong mi, olsem mi inap save na mekim wok long nem bilong God.” Dispela meri i pilim olsem pasin bilong kisim save long nem bilong God em i bikpela samting bilong helpim man long save long pasin tru bilong Jehova na pas gut wantaim em.
2 Bilong Wanem Yumi Mas Tokim Ol Man Long Dispela Nem?: Taim man i kisim save long nem bilong God, em i kisim save tu long ol pasin bilong em, ol samting em i tingting pinis long kamapim, na ol wok em i bin mekim. Na tu, yumi mas save long nem bilong God na bai God inap kisim bek yumi. Aposel Pol i tok: “Olgeta manmeri i singaut long nem bilong Jehova, bai em i kisim bek ol.” Tasol Pol i tok moa: “Olsem wanem bai ol i askim em long helpim ol” sapos ol i no kisim save long Jehova na bilip long em? Olsem na em i bikpela samting long ol Kristen i mas wok hariap long tokim ol man long nem bilong God na olgeta samting dispela nem i makim. (Ro. 10:13, 14; NW ) Tasol i gat narapela samting i olsem bikpela as moa na yumi mas tokim ol man long nem bilong God.
3 Long 1925 samting, lain bilong God i kisim save long rot bilong Baibel olsem wanpela bikpela tok i bin kamap long wok bos bilong God na long nem bilong em i mas i stap holi. Paslain long Jehova i bagarapim ol man nogut na pinisim ol tok nogut ol man i bin sutim long nem bilong em, “olgeta lain manmeri” i mas save long em. (Ais. 12:4, 5; Ese. 38:23) Olsem na nambawan bikpela as bilong wok autim tok em long litimapim nem bilong Jehova na long mekim holi nem bilong em long ai bilong olgeta man. (Hi. 13:15) Pasin bilong laikim tru God na ol man bai kirapim yumi long insait tru long dispela wok God i bin givim long yumi.
4 “Wanpela Lain i Holim Nem Bilong Em”: Long 1931 yumi bin kisim dispela nem Ol Witnes Bilong Jehova. (Ais. 43:10) Kirap long dispela taim i kam, lain bilong God i bin mekim bikpela wok tru bilong tokaut long dispela nem, olsem na buk Proclaimers, pes 124, i tok: “Long olgeta hap bilong graun, sapos wanpela man i mekim wok long dispela nem Jehova, kwiktaim ol man bai luksave olsem em i wanpela Witnes Bilong Jehova.” Olsem wanem? Ol man i luksave olsem long yu? Pasin bilong tenkyu long gutpela pasin bilong Jehova i mas kirapim yumi long ‘tokaut long biknem bilong em,’ na tokim ol narapela long em long taim i stret long mekim.—Sng. 20:7; 145:1, 2, 7.
5 Yumi olsem “wanpela lain i holim nem bilong em,” olsem na yumi mas strong long bihainim ol lo bilong em. (Ap. 15:14, NW; 2 Ti. 2:19) Planti taim, namba wan samting ol man i luksave long en long ol Witnes Bilong Jehova em gutpela pasin bilong ol. (1 Pi. 2:12) Yumi nolaik tru long bagarapim nem bilong em long rot bilong kalapim ol lo bilong em o mekim pasin bilong lotuim em i stap olsem namba tu samting long laip bilong yumi, nogat. (Wkp. 22:31, 32; Mal. 1:6-8, 12-14) Ol samting yumi mekim long i stap bilong yumi i mas kamapim klia yumi amamas tru long nem bilong God i stap long yumi.
6 Long nau, yumi lukim truim bilong tok Jehova i bin mekim: “Ol manmeri bilong olgeta kantri ol i save givim biknem long mi.” (Mal. 1:11) Yumi ken wok yet long tokim ol man long ol tok i tru bilong ol samting bilong Jehova na “litimapim nem bilong en oltaim oltaim.”—Sng. 145:21.
[Askim Bilong Stadi]
1. Taim ol man i kisim save long nem bilong God, dispela inap mekim wanem long ol?
2. Bilong wanem na em i bikpela samting long yumi mas skulim ol narapela long Jehova?
3. Wanem nambawan bikpela as na yumi mekim wok autim tok?
4. Olsem wanem na nem bilong God i kirapim ol man long tingim ol Witnes Bilong Jehova?
5. Nem bilong God i stap long yumi na olsem wanem dispela i stiaim pasin yumi mekim?
6. I gat wanem gutpela samting em yumi inap amamas long en long nau na i go inap oltaim oltaim?