Wanpela Bung Bilong Helpim Ol Man Bilong Autim Tok
1 Long 1938, oganaisesen bilong Jehova i kamapim wanpela nupela bung. Sampela kongrigesen i mas bung wantaim long zone kibung, em nau yumi kolim olsem sekit kibung. Bilong wanem ol i kamapim dispela bung? Nius Informant, (em nau yumi kolim Wok Kingdom Bilong Yumi) bilong Janueri 1939 i tok: “Ol dispela kibung i olsem wanpela hap wok bilong oganaisesen bilong Jehova long stiaim gut wok bilong autim tok bilong Kingdom. Ol tok ol i kamapim long ol dispela kibung i bikpela samting long olgeta wan wan, long wanem ol dispela tok inap helpim ol long mekim gut wok em ol i kisim.” Long 1938, i bin i gat 58 tausen man tasol i bin autim tok bilong Kingdom. Tasol long 2009, namba i go antap winim 7 milion. Long ol dispela namba, yumi lukim olsem planti man moa i kirap long autim tok bilong Kingdom, na dispela i kamapim klia olsem ol kibung sekit i inapim tru wok bilong en long helpim ol man bilong autim tok long “mekim gut wok ol i kisim”!
2 As Tok Bilong Sekit Kibung Bilong Neks Yia: Yumi redi long harim program bilong kibung sekit bilong 2011 na ol gutpela tok bai kamap long en. As tok bilong dispela kibung i kam long Jon 15:19, olsem “Yupela i No Insait Long Ol Samting Bilong Dispela Graun.” Wanem sampela tok i kamap bai helpim tru ol wokman Kristen? Long Sarere bai yumi harim dispela tok, “Olsem Wanem Wok Bilong Fultaim Sevis i Lukautim Yumi?” Yumi bai amamas long harim wanpela tok i gat tripela hap, nem bilong en: “No Ken Larim . . . ‘Wel Animal’ i Mekim Yu Kamap Doti,” “ ‘Bikpela Pamukmeri’ i Mekim Yu Kamap Doti,” na “ ‘Ol Man Bilong Graun i Save Mekim Wok Bisnis’ i Mekim Yu Kamap Doti.” Long Sande bai yumi harim tok i gat fopela hap, nem bilong en: “Laikim Tru Jehova, Dispela Graun, Nogat.” Ol narapela tok bai kamap em: “Stap Yet Olsem ‘Ol Man Bilong Narapela Ples na Ol Tripman,’ ” na “Strongim Bel! Yu Inap Winim Strong Bilong Dispela Graun.”
3 Wanpela sista husat i save autim tok wan wan taim tasol, em i bin go long wanpela kibung sekit, na bihain em i raitim pas na i tok program bilong dispela kibung i bin kirapim em long skelim gen sindaun bilong em. Na em i kisim strongpela tingting olsem, nau em i “mas i go autim tok na no ken painim kain kain eskius long abrusim dispela wok!” Tru tumas, sekit kibung bilong neks yia bai helpim yumi long laikim tru Jehova na no ken laikim dispela graun. (1 Jo. 2:15-17) Yu mas stap long dispela kibung na putim gut yau long ol tok bai kamap na bai yu ken kisim bikpela helpim long dispela gutpela bung bilong helpim ol wokman Kristen!
[Askim Bilong Stadi]
1. Oganaisesen bilong Jehova i kamapim wanem nupela bung long 1938? Bilong wanem ol i kamapim dispela bung?
2. Yumi bai harim wanem ol tok long sekit kibung bilong 2011?
3. Sapos yumi go long sekit kibung, dispela bai helpim yumi olsem wanem?