Wanpela Kibung Sekit Bilong Lukautim Yumi Long Sait Bilong Spirit
1. Wanem wanpela samting Jehova i kamapim bilong helpim yumi long inapim wok bilong yumi long autim gutnius?
1 Jehova i givim planti save, skul, na strong long yumi, em samting yumi mas kisim bilong mekim wok em i bin givim long yumi long autim gutnius. (Mt. 24:14; 2 Ti. 4:17) Kibung sekit bilong yumi i save kamap long olgeta yia, em wanpela rot bilong yumi ken kisim dispela samting. Nupela program bilong 2010 bai stori long tim, “Lukautim Yu Yet Long Sait Bilong Spirit.” Dispela tok i kam long Rom 8:5 na Jut 17-19.
2. (a) Kibung sekit bai helpim yumi olsem wanem? (b) Ol kibung i bin kamap long ol yia i go pinis i bin helpim yu olsem wanem long wok autim tok?
2 Gutpela Helpim Tru: Dispela program bai helpim yumi long luksave long ol samting i laik bagarapim yumi, olsem ol samting i kisim nating bikpela haptaim bilong yumi na i pulim nabaut tingting bilong yumi na yumi no tingim ol samting i bikpela samting tru. Yumi bai lain long olsem wanem yumi ken abrusim pasin bilong orait tasol long olgeta samting, na yumi bai skelim wanem ol pasin i makim olsem man i save tingim tru ol samting bilong spirit. Tok i gat tripela hap i kamap long Sande, em bai stori long olsem wanem ol wan wan man na ol famili i ken mekim samting bilong strongim ol yet long ol samting bilong spirit, maski i gat planti hevi na ol samting i traim tru bilip bilong ol. Dispela program bai helpim yumi long was gut long bel bilong yumi, stap strong long ol samting bilong spirit, na holim strong long tingting ol gutpela blesing tru i wetim ol manmeri em ol i lukautim ol yet long sait bilong spirit.
3. Yu tingting pinis long mekim wanem?
3 Taim yu save pinis long taim na ples em kibung sekit bai kamap long en, mekim ol samting bilong i go na putim gut yau long ol tok bai kamap insait long program bilong tupela de. Tingim, Jehova i save blesim wok bilong ol man i save tingting gut na mekim wok.—Snd. 21:5.
4. Yumi bai kisim wanem samting long kibung sekit bilong yumi?
4 Jehova em Man Bilong Givim dispela gutpela presen. Dispela program em wokboi i gat gutpela tingting i bin redim, em samting yumi mas kisim bilong mekim yet wok bilong yumi olsem ol wokman Kristen. Yumi tenkyu tru long Jehova long em i save givim yumi ol samting yumi mas kisim bilong helpim yumi long ‘tokaut long bilip bilong yumi na long ol gutpela samting yumi wetim i stap. Yumi holim strong bilip bilong yumi, na yumi no pret na surik.’—Hi. 10:23-25; Jem. 1:17.