Lukautim Gut Tingting Bilong Yu
1. Wanem het tok bilong kibung sekit bilong 2013? Bilong wanem ol i kamapim dispela kibung?
1 Jisas i tokim ol disaipel long laikim Jehova long bel, laip, na tingting olgeta bilong ol. (Mat. 22:37, 38) Ol kibung distrik na ol kibung sekit bilong dispela yia i bin helpim yumi long strongim ol pasin tru bilong yumi. Kibung distrik bilong yumi bai i gat dispela het tok “Lukautim Gut Tingting Bilong Bel!” Na het tok bilong spesel de kibung bilong 2013, em “Lukautim Gut Maus Bilong Bel Bilong Yu.” Na ol kibung sekit em bai kirap neks yia bai i gat dispela het tok “Lukautim Gut Tingting Bilong Yu,” em Matyu 22:37 i as bilong dispela tok. Dispela kibung bai helpim yumi long skelim ol tingting bilong yumi, long wanem, yumi laik bai Jehova i amamas long en.
2. Taim yumi harim ol tok bilong kibung, yumi mas tingim bekim bilong wanem ol askim?
2 Ol Tok Bai Kamap: Taim yumi putim yau long ol tok bilong kibung sekit yumi ken tingim ol bikpela poin, em i olsem bekim bilong ol dispela askim:
• Olsem wanem yumi inap abrusim pasin bilong bihainim ‘tingting bilong ol man’?
• Yumi ken mekim wanem bilong rausim dispela laplap i haitim gutnius na i pasim tingting bilong ol man i no bilip?
• Yumi laik holim wanem tingting?
• Olsem wanem pasin bilong tingim tingim long bel ol samting inap helpim yumi?
• Olsem wanem yumi ken larim Jehova i stiaim tingting bilong yumi?
• Ol maritman, ol maritmeri, ol papamama, na ol pikinini inap mekim wanem bilong helpim famili i stap amamas?
• Olsem wanem yumi ken redi long de bilong Jehova?
• Wanem mining bilong dispela tok, redim tingting bilong yupela long mekim wok?
• Ol manmeri husat i bihainim ol tok ol i lainim, ol i kisim wanem ol gutpela samting?
3. Bilong wanem i bikpela samting long yumi mas i stap long tupela de bilong kibung, putim gut yau, na bihainim ol tok yumi lainim?
3 Satan i wok strong long bagarapim tingting bilong yumi. (2 Kor. 11:3) Olsem na yumi mas lukautim gut tingting bilong yumi na bosim gut. Yumi mas wok long kamapim olsem tingting bilong Krais i stap long yumi, na wok strong long sakim ol tingting na pasin bikhet bilong ol manmeri bilong dispela graun. (1 Kor. 2:16) Olsem na yumi mas stretim ol samting na bai yumi ken stap long tupela de bilong kibung. Putim gut yau. Taim yumi bihainim ol bikpela tok yumi harim, dispela bai helpim yumi long redim tingting bilong yumi long givim bel long mekim wok bilong Kingdom.—1 Pita 1:13.