Tok Bilong God i Gutpela Long Skulim Man

1. Wanem as tok bilong kibung sekit bilong 2014? Long kibung bai yumi skelim bekim bilong wanem ol askim?

¹ Jehova em Nambawan Bikpela Tisa bilong yumi, em i winim tru olgeta tisa bilong graun. (Ais. 30:20, 21) Long wanem rot Jehova i save skulim yumi? Em i kamapim wanpela buk i winim olgeta narapela buk—em Baibel, em Tok bilong em. Olsem wanem skul yumi kisim long Baibel inap helpim yumi long ol samting bilong skin, tingting, bel, na long pas gut wantaim God? Long ol tok i kamap long kibung sekit bilong yumi long 2014, bai yumi skelim bekim bilong ol dispela askim. As tok bilong kibung sekit, em “Tok Bilong God i Gutpela Long Skulim Man,” em i kam long 2 Timoti 3:16.

2. Long rot bilong ol bekim, bai yumi kisim ol bikpela poin bilong wanem ol askim?

² Tingim Ol Dispela Bikpela Poin: Ol bekim bilong ol dispela askim bai kamapim klia ol bikpela poin bilong ol tok bilong kibung:

• Skul yumi kisim long Baibel i mekim wanem long yumi? (Ais. 48:17, 18)

• Sapos yumi wok strong long senisim ol samting long sindaun bilong yumi bambai yumi inap mekim wok bilong Jehova fultaim, yumi inap bilip tru long wanem samting? (Mal. 3:10)

• Yumi mas mekim wanem taim man i autim “ol tok i narakain”? (Hib. 13:9)

• Hau bai yumi bihainim “pasin bilong [Jisas] long skulim ol man”? (Mat. 7:28, 29)

• Bilong wanem ol tisa long kongrigesen i mas skulim ol yet? (Rom 2:21)

• Tok Bilong God i save helpim yumi olsem wanem? (2 Tim. 3:16)

• Ol manmeri i mekim wanem taim Jehova i “seksekim olgeta lain man”? (Hag. 2:6, 7, NW )

• Jehova i save tru olsem yumi inap mekim wanem? (Efe. 5:1)

• Bilong wanem yumi mas wok strong long bihainim ol skul yumi kisim long Jehova? (Luk 13:24)

3. Bilong wanem em i bikpela samting long go long kibung na putim gut yau long ol tok em yumi kisim long taim stret?

³ Long 2 Timoti sapta 3, paslain long Pol i raitim ol tok bilong ves em as tok bilong kibung i kam long en, em i stori long taim nogut bai kamap we i makim olsem yumi stap long taim bilong las de. Em i tok: “Ol man nogut na ol man bilong giaman bai i go nogut moa, ol bai giamanim ol arapela na bai i gat ol man i giamanim ol tu.” (2 Tim. 3:13) Em i bikpela samting long yumi putim gut yau na bihainim ol tok bilong God, na bai ol man nogut i no ken giamanim yumi. Olsem na yumi mas tingting strong long go long kibung na putim gut yau long ol tok em yumi kisim long taim stret.