Tok Bilong God i Wok Strong i Stap
1. Wanem as tok bilong spesel de kibung bilong 2014?
1 Ol samting em ol man bilong graun i wokim i no gat strong long senisim yumi, tasol Baibel i gat strong long senisim pasin bilong yumi, stretim ol tingting na ol pasin bilong yumi na bai i stret wantaim laik bilong Jehova. Olsem wanem Tok Bilong God i gat bikpela strong? Olsem wanem yumi inap yusim long ol samting yumi mekim long laip bilong yumi? Olsem wanem yumi inap yusim long helpim gut ol narapela? Mipela i save olsem spesel de kibung bilong 2014, bai strongim tru yumi olgeta taim yumi skelim ol dispela bikpela poin. As tok bilong kibung em “Tok Bilong God i Wok Strong i Stap,” em i kam long Hibru 4:12.
2. Yumi mas putim yau long bekim bilong wanem ol askim?
2 Putim Gut Yau Long Bekim Bilong Ol Dispela Askim: Taim yu putim yau long ol tok bilong kibung, tingim bekim bilong ol askim i stap daunbilo.
• Bilong wanem yumi mas bilip strong long ol Tok Bilong Jehova? (Sng. 29:4)
• Olsem wanem bai yumi inap lukim strong bilong Tok Bilong God long laip bilong yumi? (Sng. 34:8)
• Olsem wanem yu inap kamapim strong bilong Tok Bilong God taim yu autim tok? (2 Tim. 3:16, 17)
• Hau bai yumi was gut na yumi no pundaun long strong bilong dispela graun bilong Satan long giamanim yumi? (1 Jon 5:19)
• Olsem wanem ol yangpela inap pas gut wantaim God? (Jer. 17:7)
• Taim yumi no gat strong, olsem wanem long dispela taim yumi gat strong tru? (2 Kor. 12:10)
• Maski yumi gat wanpela pasin o tingting nogut inap longpela taim pinis, wanem samting inap helpim yumi long wok yet long senisim dispela pasin? (Efe. 4:23)
3. Yumi putim yau long ol tok bilong kibung, tasol long wanem narapela rot spesel de kibung i helpim yumi?
3 Ol tok yumi harim long kibung bai helpim tru yumi. Na tu, olsem kibung sekit na kibung distrik, spesel de kibung bai opim rot long yumi mekim pasin laikim bilong yumi i go bikpela moa taim yumi amamas wantaim ol narapela narapela bratasista bilong ol narapela kongrigesen. (Sng. 133:1-3; 2 Kor. 6:11-13) Olsem na yumi mas i gat taim bilong toktok wantaim ol bratasista yumi save long ol, na bungim ol nupela lain. Sapos wanpela brata, olsem distrik wasman o brata em brens i salim i kam long spesel de kibung bilong yupela, i gutpela long toktok wantaim em na meri bilong em, sapos em i marit. Tru tumas, i gat as tru na yumi wetim dispela spesel de kibung bai kamap!