Program Bilong Spesel De Kibung Bilong 2010
1. (a) Insait long sampela yia i go pinis, wanem sampela as tok bilong ol spesel de kibung? (b) Wanem ol bikpela tok bilong ol spesel de kibung i bin helpim yu long wok autim tok?
1 “Skelim Gut Wanem Ol Samting i Bikpela Samting Moa,” “Sanap Strong na i Stap Wanlain Tru,” “Wok Long Autim Tok i Tru,” na “Yumi Olsem Graun—Jehova i Man Bilong Wokim Sospen.” (Fl. 1:9, 10, 27, NW; Jo. 18:37; Ais. 64:8) Em sampela tasol bilong ol as tok bilong ol spesel de kibung i go pinis. Olsem wanem? Yu amamas long i go long spesel de kibung bilong 2010? Dispela kibung bai stori long dispela as tok: “Taim i Sotpela Nau,” ol i kisim long 1 Korin 7:29.
2. Bilong amamas long wetim spesel de kibung i kamap, yupela i ken mekim wanem?
2 Taim ol i toksave long det bilong spesel de kibung long kongrigesen bilong yupela, yupela i ken kirap stori long dispela kibung na amamas long en. Sampela papamama i save helpim ol pikinini bilong ol long amamas long wetim dispela de long rot bilong makim dispela de long famili kalenda, na ol i raitim lista bilong ol samting em olgeta wan wan i mas kisim i go long kibung, na ol i kaunim hamas de i stap yet inap long kibung i kamap. Long taim bilong Famili Lotu bilong yupela, ating yupela i ken mekim riviu long ol tok yupela i bin raitim long ol spesel de kibung i go pinis. Na tu, yupela i ken redim bel na tingting bilong yupela long putim gut yau na “harim gut tok” bilong dispela kibung, long rot bilong skelim gen ol tok bilong buk Kisim Helpim Long Skul Tiokratik Bilong Autim Tok, long pes 13-16.—Lu. 8:18.
3. Yumi inap mekim wanem na bai ol tok bilong kibung i ken helpim tru yumi?
3 Bihainim Ol Tok Yu Lainim: Planti taim yumi harim dispela kain tok bihain long kibung, “Man! Em gutpela program tru!” Na oltaim dispela tok em i stret, long wanem, kibung em wanpela bilong planti gutpela samting i kam long Jehova. (Snd. 10:22) Bilong ol tok bilong kibung i ken karim gutpela kaikai, yumi mas tingim tingim long bel ol tok bilong en na holim strong. (Lu. 8:15) Taim yumi lusim kibung na wok long i go long haus, i gutpela sapos yumi stori wantaim famili long ol tok bilong program o toktok wantaim ol narapela i stap long ka. Yumi ken stori long ol mak yumi laik winim na ol poin yumi laik bihainim bilong helpim yumi long mekim wok autim tok. Taim yumi mekim olsem, ol tok bilong kibung bai helpim yumi long olgeta taim.—Jem. 1:25.
4. Bilong wanem dispela kibung em wanpela spesel kibung long yumi?
4 Yumi save amamas tru taim yumi kisim wanpela presen i helpim tru yumi. Olsem wanem? Yumi amamas na wet long kisim ol tok em Jehova i bin redim bilong yumi long narapela spesel de kibung? Yumi ken save tru olsem dispela kibung bai helpim tru yumi. Yumi save olsem Papa bilong yumi long heven, em Jehova, bai givim yumi presen i stret long yumi, long rot bilong strongim yumi na skulim yumi long mekim wok em i bin givim long yumi.—2 Ti. 4:2; Jem. 1:17.