Nupela Program Bilong Bikpela De Kibung

Long dispela sevis yia, as tok bilong bikpela de kibung em Baibel i as bilong en i olsem: “Stap Aninit Long God​​—⁠Sakim Satan.” (Jems 4:⁠7) Em gutpela tok bilong stiaim wokabaut bilong yumi long dispela taim bilong planti hevi! Yumi bihainim ol tok bilong God, olsem na dispela i mekim na Satan i laik pait stret long yumi. Dispela program bai skulim yumi long rot bilong sanap strong na sakim ol wok nogut bilong Satan bilong pundaunim yumi long bilip. Wanem sampela gutpela samting bilong spirit yumi bai kisim long dispela kibung?

Wasman sekit bai toktok long olsem wanem pasin bilong “Famili i Stap Aninit Long God” i save strongim ol famili long sakim ol traim bilong dispela graun. Namba wan tok bilong brata em brens i salim, em “Samting Yumi Mas Mekim Bilong Sakim Satan.” Dispela tok bai kamapim as na yumi mas strong long sakim ol samting Satan i mekim bilong bagarapim yumi long ol samting bilong spirit, na long wanem ol rot yumi inap mekim olsem. Tupela tok long dispela kibung i bilong ol yangpela, em ol tu i mas sakim ol wok nogut bilong Satan. Planti Kristen ol i bikpela pinis, ol i no bin bihainim pasin bilong dispela graun taim ol i stap yangpela. Yumi bai amamas long harim sampela ekspiriens bilong ol.

Olgeta man i gat wok long stap daun long ol man i gat namba bilong mekim wok bos. Olsem na long laspela tok bilong brata brens i salim, em bai kamapim klia fopela hap we i bikpela samting long yumi mas kamapim pasin bilong i stap daun (1) long gavman, (2) long kongrigesen, (3) long ples wok, na (4) insait long famili. Em gutpela program tru bilong helpim yumi!

Ol lain i laik kisim baptais long dispela bikpela de kibung ol i mas toksave kwik long wasman siaman. Yumi olgeta i mas makim det bilong kibung long kalenda bilong yumi na stretim rot bilong yumi inap stap long program olgeta bilong kibung. Taim yumi wok oltaim long daunim yumi yet aninit long Jehova, ol blesing yumi kisim bai stap oltaim oltaim.