Nupela Program Bilong Spesel De Kibung
Ai bilong yumi man i narapela kain samting tru. (Sng. 139:14) Tasol em i no inap lukluk gut long planti samting long wankain taim. Dispela tok i stret long ai tru tru na long ai bilong spirit. Bilong ai bilong spirit bilong yumi i ken stap klia na i lukluk gut, yumi mas tingting tasol long mekim laik bilong God. I gat planti samting bilong dispela graun Satan i bosim i laik pulim nabaut tingting bilong yumi, olsem na i stret tim bilong spesel de kibung bilong 2006 bai stori long “Ai i Mas Holim Wanpela Tingting.”—Mt. 6:22.
Yumi ken mekim wanem bilong kisim ol blesing i kam long Jehova? (Snd. 10:22) Ol bai stori long bekim bilong dispela askim long tok, “Kisim Ol Blesing Taim Ai Bilong Yumi i Holim Wanpela Tingting.” Ol inteviu bai kamapim olsem wanem yumi ken kisim helpim taim yumi bihainim ol stiatok bilong Baibel. Namba wan tok bilong brata brens i salim em “Ai Bilong Yumi i Holim Wanpela Tingting Maski Yumi Stap Namel Long Ol Man Nogut.” Dispela tok bai stori long ol samting yumi mas was gut long en, em ol samting i save pulim taim na strong bilong yumi na bai isi isi yumi go slek long samting bilong spirit. Na tu, bai yumi kisim save long ol samting yumi mas mekim bilong kisim “gutpela samting tru.”—Lu. 10:42.
Ol papamama na ol arapela inap mekim wanem bilong kirapim ol yangpela Kristen long tingim ol samting bilong spirit? I gat tupela tok bilong program em “Ol Papamama Husat i Sutim Stret Ol Spia Bilong Ol” na “Ol Yangpela Em Ol i Wok Long Winim Ol Mak Bilong Spirit,” bai kamapim sampela tok bilong ol papamama na ol yangpela bilong bekim dispela bikpela askim. (Sng. 127:4) Brata brens i salim i kam bai mekim laspela tok na em bai stori long olsem wanem yumi wan wan, yumi ol famili, na kongrigesen olgeta i ken mekim wok wantaim oganaisesen bilong Jehova.
Maski yumi nupela long tok i tru o yumi bin lotuim Jehova inap planti yia, em i bikpela samting long ai bilong yumi i holim wanpela tingting. Program bilong dispela spesel de kibung bai helpim yumi long mekim olsem.