Nupela Program Bilong Bikpela De Kibung

Long nau yumi inap kisim planti save long yumi ken mekim wanem na bai yumi no sik planti na yumi inap i stap gutpela na longpela taim moa. Tasol em i bikpela samting moa long lukautim gut bel bilong yumi. Olsem na het-tok bilong program bilong bikpela de kibung bilong 2004 i stret tru: “Long Bel Olgeta​—⁠Yumi Mekim Wok Bilong Jehova.” (1 Sto. 28:​9, NW ) Yumi ken wet long lainim wanem ol samting?

Wasman sekit bai mekim tok “Helpim Ol Narapela Long Amamas Long Mekim Wok Bilong Jehova.” Ol inteviu bai kamapim klia amamas yumi kisim taim yumi go bek na helpim ol man i laik kisim save na stadi long Baibel wantaim ol man i laik mekim wok bilong Jehova. Namba wan tok bilong brata em brens i salim, “Was Gut Long Bel Nau Long Taim Bilong Planti Hevi,” bai strongim na mekim gut bel bilong olgeta i kam long kibung. Tok bilong baptais em laspela tok bilong program long moningtaim.

Long apinun, tok “Helpim Ol” bai skelim ol samting yumi ken mekim bilong helpim ol narapela. Ol papamama i ken mekim wanem bilong helpim ol pikinini long i go klostu long Jehova, na lukautim bel bilong ol na bai ol samting nogut i no ken paulim ol? Tok “Helpim Ol Pikinini Bilong Yu Long Amamas Long Jehova” bai kamapim ol gutpela tok bilong helpim ol papamama long skulim gut ol pikinini na i soim olsem wanem ol i ken mekim olsem.

Olsem wanem? Yumi save mekim wok long olgeta samting Jehova i givim bilong strongim bel bilong yumi na helpim bel i stap gut? Laspela tok bilong brata em brens i salim, “Givim Yet Bel Olgeta Long Mekim Wok Bilong Jehova,” bai skelim 4-pela bikpela samting bilong helpim yumi long stap strong long spirit. Yumi save lusim hamas taim long beten, stadi long Tok Bilong God, givim bel long autim tok, na bung wantaim ol narapela Kristen? Olsem wanem? Yumi inap mekim gut moa sampela bilong ol dispela wok?

Jehova i mekim dispela singaut: “Sapos ol i skulim yu, yu mas lainim gut ol dispela samting. Na yu mas putim yau gut long olgeta tok i gat gutpela save.” (Snd. 23:12) Tingting nau long go long dispela kibung bilong kisim gutpela skul long Baibel. Taim yu mekim olsem, dispela bai strongim yu long mekim yet wok bilong Jehova long bel olgeta na wantaim amamas.