Nupela Program Bilong Spesel De Kibung
Sapos yumi lukim o harim wanpela tok lukaut tasol yumi no bihainim, dispela inap kamapim ol hevi. Em i bikpela samting moa long bihainim ol tok Jehova i givim long ol samting bilong spirit. Ol tok bai kamap long spesel de kibung bilong 2005 bai strongim dispela tok. Tim bilong kibung em, “Tingim Pasin Bilong Yu Long Putim Yau.”—Lu. 8:18.
Long namba wan tok bilong em, brata em brens i salim bai stori long olsem wanem ol sapta long kirap bilong pas Pol i raitim i go long ol Hibru i stret long yumi long nau. Long laspela tok, “Oltaim Putim Gut Yau Long Tok Bilong God,” em bai helpim olgeta long skelim ol yet olsem ol i putim gut yau long Jehova, Pikinini bilong em, na “wokboi i gat gutpela tingting” o nogat.—Mt. 24:45.
Sampela tok long program bai i helpim ol famili. Dispela tok, “Ol Famili i Putim Yau Long Tok Bilong God na Tingting Bilong Ol i No Wokabaut,” bai helpim yumi long no ken larim ol samting bilong graun long pasim yumi long kamap strong long ol samting bilong spirit. Bai i gat ol inteviu bilong ol bratasista em ol i mekim sampela senis long ol samting ol i save mekim bambai ol i ken putim ol samting bilong spirit i stap namba wan. Dispela tok, “Olsem Wanem Pasin Bilong Putim Gut Yau Long Tok Bilong God i Strongim Ol Yangpela,” bai i gat inteviu bilong ol yangpela em ol i bin sambai long tok i tru long skul, o long ol wankrismas bilong ol, o long taim ol i autim tok. Narapela tok “Ol Liklik Pikinini i Putim Yau Long Tok Bilong God na Ol i Kisim Save,” bai helpim yumi long no ken ting olsem ol liklik pikinini i no inap kisim save. Ol inteviu bilong ol yangpela na papamama bilong ol bai helpim yumi long luksave olsem gutpela samting i save kamap taim papamama i kirap skulim ol pikinini bilong ol long tok bilong Jehova taim ol i liklik yet.
Satan i “giamanim olgeta manmeri bilong graun,” tasol Jehova i wok long soim ol man i stap gut long em long rot ol i mas wokabaut long en. (KTH 12:9; Ais. 30:21) Taim yumi putim gut yau long tok bilong em na bihainim long i stap bilong yumi, dispela i helpim yumi long kisim gutpela tingting na save na mekim yumi i stap amamas, na em inap bringim yumi long laip oltaim.—Snd. 8:32-35.