“Lukaut Gut Bai Yupela i Harim Gut Tok”

BILONG kisim save, pasin bilong putim gut yau em i bikpela samting. Em inap helpim man long abrusim bagarap na i stap laip. Taim Jehova i laik kisim bek lain bilong em long Isip, em i givim tok long Moses, na Moses i tokim ol hetman long ol samting ol i mas mekim bambai ensel i no ken kilim i dai ol namba wan pikinini bilong ol. (Kis. 12:21-23) Orait nau ol hetman i givim dispela tok long olgeta famili. Ol i mekim long maus tasol. Ol manmeri i mas putim gut yau long dispela tok. Ol i bin mekim wanem? Baibel i tok: “Orait ol Israel i mekim olsem Bikpela i bin tokim Moses na Aron.” (Kis. 12:28, 50, 51) Olsem na bikpela samting tru i kamap na Jehova i kisim bek ol Israel na ol i no bagarap.

Long nau, Jehova i wok long redim yumi long abrusim wanpela bagarap i bikpela moa. Olsem na yumi mas putim gut yau long tok em i mekim. Yumi kisim kain tok olsem long ol miting bilong kongrigesen. Olsem wanem? Ol dispela bung i save helpim yu gut tru? Bikpela samting em pasin bilong yu long harim gut tok.

Yu save holim long tingting ol bikpela tok i kamap long ol miting? Yu save painim rot long olgeta wik bilong bihainim ol tok yu bin harim o bilong tokim ol narapela long en?

Redim Bel Bilong Yu

Bilong kisim gutpela helpim long ol tok i kamap long ol miting Kristen, yumi mas redim bel bilong yumi long bihainim tru ol dispela tok. Samting i bin kamap taim Jehosafat i stap king i kamapim klia dispela samting. Jehosafat i strong long bihainim lotu i tru. Em i “go raun long olgeta hap bilong kantri Juda na i bagarapim olgeta ples bilong lotu long ol giaman god,” na em i salim ol bikman, ol Livai, na ol pris i go bilong skulim ol Israel long lo bilong Jehova. Tasol sampela “ples bilong lotuim ol giaman god” i stap yet. (2 Sto. 17:6-9; 20:33) Pasin bilong lotuim ol god giaman na lotuim Jehova long ol hap bilong mekim lotu giaman, em i stap strong tru, olsem na Jehosafat i no inap pinisim dispela pasin.

Jehosafat i bin stretim rot bilong skulim ol man, tasol bilong wanem dispela i no bin helpim ol longpela taim? Baibel i tok: “Ol manmeri i no strong long [“redim bel bilong,” NW] bihainim tru God bilong ol tumbuna bilong ol.” Ol i harim tok, tasol ol i no bihainim. Nogut ol i ting rot i longwe tumas long i go long tempel long Jerusalem bilong mekim ol ofa. Bilip bilong ol i no kirapim bel bilong ol long bihainim tok.

Yumi no laik go bek long pasin bilong dispela graun bilong Satan, olsem na yumi mas redim bel bilong yumi long kisim ol tok Jehova i givim long nau. Bai yumi mekim olsem wanem? Wanpela rot em prea. Yumi mas askim God long helpim yumi long amamas long kisim ol tok bilong em. (Sng. 27:4; 95:2) Taim ol brata i larim Jehova i yusim ol long skulim yumi, maski ol i no gutpela olgeta, dispela bai helpim yumi long amamas long wok ol i mekim. Em bai kirapim yumi long tenkyu long Jehova long ol nupela samting yumi lainim na long pilim tru ol samting yumi save pinis long en. Yumi laik tru long mekim laik bilong God, olsem na yumi prea: “O Jehova, skulim mi long pasin yu laik bai mi bihainim. . . . Skulim mi na bai mi givim bel olgeta long nem bilong yu.”—Sng. 86:11, NW.

Putim Gut Yau

I gat planti samting inap pasim yumi long putim gut yau. Ating yumi tingting planti long ol hevi bilong yumi. Ol nois na ol manmeri i go i kam insait o ausait long haus bung inap pulim tingting bilong yumi. Ating pen long baksait samting i mekim na yumi no putim gut yau. Sapos yu gat ol liklik pikinini, dispela inap pulim tingting bilong yu. Wanem samting inap helpim yumi long putim gut yau long tok bilong program?

Ol samting yumi lukim i save bosim tingting bilong yumi. Olsem na lukluk long man i mekim tok. Taim em i kolim wanpela ves bilong Baibel—maski yu save gut long en—painim long Baibel, na ritim wantaim em. Sakim pasin bilong lukluk long hap i gat ol pairap samting. Sapos ai bilong yu i lukim planti samting i pulim nabaut tingting bilong yu, orait yu no inap kisim gut ol tok i kamap long pletfom.

Sapos yu “bel hevi” na wari long samting, em bai hatwok long putim gut yau long ol tok bilong program. Long kain taim olsem, beten askim Jehova long givim bel isi long yu bambai yu inap putim gut yau. (Sng. 94:19; Fl. 4:6, 7) Mekim planti taim. (Mt. 7:7, 8) Ol miting bilong kongrigesen em samting Jehova i save givim long yumi. Yumi save, em i laik bai ol miting i ken helpim yumi.—1 Jo. 5:14, 15.

Putim Yau Long Ol Tok

Ating yu inap tingim sampela tok yu laikim tru em yu bin harim long tok bilong sampela brata. Tasol taim yumi putim yau long wanpela tok, dispela i no bilong kisim ol tok yumi laikim tasol. Nogat. Yumi ken tok piksa olsem: Wanpela tok i kain olsem raun bilong yu long i go long wanpela ples. Yu inap lukim planti samting taim yu go, tasol bikpela samting em yu laik kamap long hap yu laik i go long en. Olsem na ating man bilong mekim tok i laik stiaim tingting bilong odiens na bai ol i kisim gut tingting long wanpela samting, o kirapim ol long mekim sampela samting.

Tingim tok i stap long Josua 24:1-15, em Josua i bin mekim long lain Israel. Josua i laik kirapim ol long stap strong long mekim lotu i tru na klia olgeta long pasin bilong ol narapela lain long lotuim ol imis. Bilong wanem dispela em i bikpela samting? Pasin bilong mekim lotu giaman i go bikpela na dispela inap mekim na lain Israel i no inap stap gut wantaim Jehova. Ol manmeri i bekim tok long Josua olsem: “Mipela i no inap tru long lusim Bikpela na lotu long ol giaman god. Nogat tru. . . . Olsem na mipela tu bai i lotu long Bikpela.” Na ol i mekim olsem!—Jos. 24:16, 18, 31.

Taim yu harim wanpela tok, traim kisim save olsem dispela tok i gat wanem wok bilong en. Tingting long olsem wanem ol bikpela tok em i mekim i helpim as bilong dispela tok. Askim yu yet olsem dispela tok i laik kirapim yu long mekim wanem.

Putim Gut Yau Long Ol Hap i Gat Ol Askim na Bekim

Long Stadi Wastaua, Buk-Stadi Bilong Kongrigesen, na sampela hap bilong Miting Bilong Wok yumi mekim ol askim na bekim.

Taim yumi putim yau long ol tok i kamap long ol dispela taim, i kain olsem yumi toktok wantaim narapela. Bilong dispela tok i ken helpim yumi orait yumi mas harim gut ol tok. Tingim ol tok i kamap pinis na traim tingim wanem tok bai kamap bihain. Tingting long pasin bilong brata i lukautim dispela hap long strongim tim bilong tok na ol bikpela tok. Long tingting, bekim ol askim em i kamapim. Harim gut tok ol narapela i mekim bilong stori na kamapim mining bilong ol dispela tok. Taim yumi kisim tingting bilong ol narapela long ol tok, dispela inap givim yumi sampela nupela save long samting yumi save pinis long en. Na yu yet yu ken kamapim bilip bilong yu long ol narapela long rot bilong bekim sampela tok.—Ro. 1:12.

Sapos yu stadi pastaim long ol samting sediul i makim, dispela bai helpim yu long putim gut yau long ol tok i kamap na long ol tok ol narapela i bekim. Sapos yu no inap stadi gut long ol tok pastaim, orait traim long lusim sampela minit long skelim ol tok paslain long miting. Dispela bai helpim yu long kisim gut ol tok taim ol i mekim dispela hap bilong miting.

Putim Gut Yau Long Ol Kibung

Long ol kibung i gat planti samting moa i ken pulim ai na tingting bilong yu, winim ol samting i kamap long ol miting bilong kongrigesen. Dispela inap mekim na i hatwok long harim gut ol tok. Wanem samting inap helpim yumi?

Wanpela bikpela samting, em yumi mas kisim gutpela malolo long nait. Long olgeta de, paslain long program i kirap, tingim gut tim bilong program. Ritim het-tok bilong olgeta wan wan tok, na traim long tingim stori ol bai kamapim insait long dispela tok. Mekim gutpela wok long Baibel bilong yu. Planti man i save sapos ol i raitim ol bikpela tok ol i harim, dispela i helpim ol long putim gut yau. Raitim ol tok yu laik bihainim long i stap bilong yu na long wok autim tok bilong yu. Long ol de bilong kibung, taim yu go kam long kibung, toktok wantaim narapela long sampela samting yu bin lainim. Dispela bai helpim yu long putim gut dispela tok long tingting bilong yu.

Lainim Ol Pikinini Long Putim Gut Yau

Ol papamama Kristen i ken helpim ol pikinini bilong ol—ol bebi tu—long kisim ‘gutpela tingting na bai God i ken kisim bek ol,’ taim ol i bringim ol long ol miting bilong kongrigesen, na ol kibung sekit na distrik. (2 Ti. 3:15) Pasin bilong olgeta wan wan pikinini long putim gut yau i no wankain, olsem na skelim gut ol samting yu mas mekim bilong helpim ol long lain long harim gut ol tok. Ating dispela tok hia inap helpim yu.

Long haus, makim taim bilong ol liklik pikinini long sindaun na stap isi na ritim wanpela buk o lukluk long ol piksa i stap long sampela buk na nius Kristen bilong yumi. Long ol miting, no ken larim ol i pilai wantaim ol toi. Long nau, wankain olsem long taim bilong ol Israel bilong bipo, ol pikinini i stap long miting bambai “ol i ken harim na i stap aninit long God . . . na bihainim gut olgeta tok bilong em.” (Lo 31:12) Sampela papamama i save givim ol buk yumi stadi long en long ol liklik pikinini bambai ol i gat buk bilong ol yet. Taim krismas bilong ol pikinini i wok long i go antap, helpim ol long redim sampela tok bilong bekim bambai ol inap insait long miting.

Baibel i kamapim olsem pasin bilong putim gut yau long tok bilong Jehova na pasin bilong bihainim tok bilong em, tupela i wok wantaim. Yumi ken luksave long dispela taim yumi ritim tok Moses i mekim long lain Israel: “I gat rot bilong i stap gut na rot bilong i dai. . . . Tasol mi laikim yupela i mas bihainim rot bilong i stap gut. Yupela i mas laikim tru God . . . na yupela i mas harim tok bilong en na bel tru long em oltaim.” (Lo 30:19, 20) Long nau, yumi mas putim gut yau long ol tok bilong Jehova na bihainim dispela tok long i stap bilong yumi bambai God i ken orait long yumi na yumi kisim laip oltaim. Olsem na em i bikpela samting long bihainim tok bilong Jisas olsem: “Yupela i mas lukaut gut bai yupela i harim gut tok”!—Lu. 8:18.