Putim Gut Yau
1 Bilong man i ken putim gut yau long tok em i mas bosim gut skin. Man i harim tok em i mas i gat laik long lain, na em i laik ol tok em i harim i ken helpim em. Olsem na Jisas i kamapim klia olsem yumi mas tingim pasin bilong yumi long “harim gut tok.”—Lu 8:18.
2 Yumi mas mekim olsem taim yumi go long ol miting bilong kongrigesen, long ol kibung sekit na bikpela de kibung, na long ol kibung distrik. Long ol dispela bung yumi mas putim gut yau. (Hi 2:1) Long daunbilo i gat sampela tok bilong helpim yu long putim gut yau long ol miting Kristen.
◼ Pilim ol gutpela helpim yumi save kisim long ol miting. Ol miting i wanpela bikpela rot em Jehova i save mekim wok long en bilong “skulim” yumi long rot bilong ‘wokboi i gat gutpela tingting.’—Ais 54:13; Lu 12:42.
◼ Redi gut pastaim. Redim ol tok bai kamap long miting, na kisim Baibel na ol buk samting ol i mekim wok long en long ol miting.
◼ Long taim bilong miting, wok strong long putim gut yau. No ken toktok wantaim ol man i sindaun klostu long yu, na no ken lukluk long samting ol narapela i mekim. No ken tingting long ol samting yu bai mekim bihain long miting o tingting long ol narapela samting bilong yu yet.
◼ Skelim ol tok i kamap. Askim skin bilong yu: ‘Olsem wanem mi ken bihainim dispela tok? Long wanem taim bai mi bihainim?’
◼ Raitim sotpela tok bilong ol bikpela tok na bilong Baibel. Dispela bai helpim yu long putim tingting long ol tok ol brata i kamapim, na em bai helpim yu long tingim gen ol bikpela tok bilong yu ken mekim wok long en long bihain.
3 Lainim Ol Pikinini Bilong Yu Long Putim Gut Yau: Ol pikinini i mas lain long ol samting bilong spirit. (Lo 31:12) Long bipo, namel long ol manmeri bilong God, “ol pikinini inap long putim yau gut na kisim save long tok” ol i mas harim gut taim ol pris i kaunim Lo. (Neh 8:1-3) Sapos ol papamama i insait long ol miting na putim gut yau, ol pikinini bilong ol tu bai mekim wankain. Em i no gutpela tingting long kisim ol samting bilong ol pikinini i ken pilai long en o ol buk bilong droim piksa samting bilong ol i ken amamas long en. Pasin bilong i go i kam nating long toilet tu bai mekim na yu no inap putim gut yau long ol tok. “Ol pikinini i save mekim olkain longlong pasin,” olsem na ol papamama i mas wok strong long mekim ol samting bambai ol pikinini i sindaun isi na harim gut tok long ol miting.—Snd 22:15.
4 Taim yumi putim gut yau long tok, yumi kamapim klia olsem yumi gat gutpela tingting na yumi laik “kisim save moa yet.”—Snd 1:5.
This article is repeated in km 11/06.