‘Harim na Kisim Sampela Save Moa’
1 Long Buk Sindaun gutpela tingting i singaut olsem: “Putim yau gut long gutpela na stretpela tok mi laik givim yupela. Mi inap givim gutpela tingting long ol manmeri na mi inap helpim ol long mekim gutpela wok. . . . Yupela i mas harim gut tok bilong mi na bihainim ol pasin bilong mi. Sapos yupela i mekim olsem, bai yupela i amamas. Ol man i kisim mi, ol i save kisim laip, na Bikpela i save belgut long ol.” (Snd. 8:6, 14, 32, 35) Dispela tok i stori gut long ol gutpela tok yumi bai kisim long “Ol Tisa Bilong Tok Bilong God” Kibung Distrik.
2 Mipela i bin skelim ol samting ol brata long olgeta hap i mas kisim, na mipela i redim program bilong kibung bilong skelim ol dispela samting. Sapos yumi bihainim ol gutpela tok bilong spirit na ol gutpela tok bilong helpim yumi em kibung bai kamapim, dispela bai helpim yumi long stap amamas, pas gut wantaim Jehova, na long stap long rot i go long laip oltaim. Tru tumas, i gat as tru na yumi mas putim gut yau na “kisim save moa.”—Snd. 1:5.
3 Paslain Long Program: Bilong program i ken helpim yumi tru, yumi mas sindaun na redim tingting bilong yumi taim program i kirap. Bilong mekim olsem yumi mas stretim gut ol samting. Em bikpela samting long kirap hariap. Go slip hariap long nait. Kirap hariap long moningtaim na bai yupela olgeta i gat taim bilong redi na kisim kaikai. Kam hariap long ples kibung bambai yu inap painim ples sindaun na mekim ol samting yu mas mekim paslain long program i kirap. Program bai kirap long 9 klok moningtaim long olgeta de.
4 Nambawan as bilong ol dispela bung em i bilong litimapim nem bilong Jehova “namel long ol manmeri i bung bilong lotu,” olsem na olgeta hap bilong program i mas kirap long pasin i litimapim nem bilong God. (Sng. 26:12) Bilong mekim olsem, yumi olgeta i mas sindaun paslain long ol i toksave long singsing bilong kirapim program. Dispela i stret wantaim tok bilong Baibel: “Yupela i mas bihainim stret ol gutpela pasin bilong lotu.” (1 Ko. 14:40) Olsem na yumi olgeta i mas mekim wanem? Taim yu lukim siaman i sindaun long pletfom taim ol i pilai musik, orait go hariap long ples sindaun bilong yu. Dispela bai helpim yu long givim bel long singsing long kirap bilong olgeta hap bilong program na litimapim nem bilong Jehova.—Sng. 149:1.
5 Long Taim Bilong Program: Esra i “wok strong long kisim save long lo bilong Bikpela na long bihainim gut dispela lo.” (Esr. 7:10) Olsem wanem yumi ken wok strong bilong kisim save i kam long Jehova? Taim yu skelim ol het-tok bilong ol tok i stap long program ol i prinim, askim yu yet: ‘Jehova i laik tok wanem long mi long rot bilong dispela program? Mi ken mekim wanem bilong ol dispela tok inap helpim mi na famili bilong mi?’ (Ais. 30:21; Ef. 5:17) Mekim ol dispela askim long olgeta de bilong kibung. Raitim ol tok yu tingting long bihainim. Long olgeta de lusim hap taim bilong toktok long ol dispela samting bihain long program. Dispela bai helpim yu long tingim na bihainim dispela tok.
6 Tru, i hatwok long putim gut tingting long ol tok inap planti aua. Wanem samting inap helpim yumi na tingting bilong yumi bai no wokabaut? Yumi ken mekim wok long ai bilong yumi. Tingting bilong yumi i save stap long samting yumi lukluk long en. (Mt. 6:22) Olsem na no ken lukluk long hap sampela pairap i kamap long en o long ol man i wokabaut i go i kam. Lukluk long brata i mekim tok. Taim brata i ritim skripsa, opim Baibel na lukluk long skripsa, na larim Baibel i op i stap taim brata i skelim tok bilong en.
7 Pasin sori Kristen bai mekim na yumi no laik pulim tingting bilong ol narapela long taim bilong program. (1 Ko. 13:5) Kibung em “taim bilong pasim maus” na harim ol tok. (Sav. 3:7) Olsem na abrusim pasin bilong toktok na wokabaut nabaut. Skelim gut na no ken go planti taim long toilet. Kisim kaikai o loliwara long hap taim ol i makim bilong mekim dispela samting, tasol sapos sik i mekim na yu mas kaikai, orait yu ken mekim olsem. Ol man i bringim mobail-fon, video-kamera, o kamera, ol i mas was gut taim ol i yusim ol dispela samting, nogut ol i pulim tingting bilong ol narapela. Ol papamama i mas stretim ol samting bambai famili olgeta—ol bikpela pikinini tu—i sindaun wantaim bambai papamama i ken was long ol.—Snd. 29:15.
8 Wanpela elda i bin go long ol kibung inap planti yia pinis, na long las yia em i tok olsem: “Mi ting i gat narapela as tu na dispela kibung i gutpela tru. Klostu olgeta long odiens i raitim sampela tok long notbuk, ol yangpela pikinini tu. Mi amamas tru long lukim dispela. Planti ol i lukluk long Baibel taim brata i mekim tok i kirapim ol long mekim olsem.” Pasin bilong putim gut yau olsem em i gutpela samting tru. Dispela bai helpim yumi yet na ol narapela i kam long kibung, tasol bikpela samting moa em i litimapim nem bilong Nambawan Tisa bilong yumi, em God Jehova.—Ais. 30:20.