Putim Gut Yau na Kisim Save
1. Bilong wanem yumi mas wok strong moa long putim gut yau na kisim save long kibung?
1 Klostu nau ol kibung distrik bilong 2013 bai kamap. Ol i bin mekim bikpela wok long redim wanpela program we i kamapim olsem i gat bikpela wok nau long mekim long olgeta hap bilong graun. Olsem wanem? Yu stretim pinis ol samting bambai yu inap i stap long dispela 3-pela de bilong kibung distrik? Long ol bikpela kibung i gat planti samting inap pulim nabaut tingting, olsem na yumi mas wok strong long putim gut yau. Ol wan wan hap bilong program i longpela moa long ol miting bilong kongrigesen, olsem na yumi mas wok strong moa long bosim gut tingting na bai tingting i no ken wokabaut. Na tu, sampela i kam long ol longwe ples, na i gat ol narapela samting we inap mekim na yumi pilim skin i les. Wanem samting bai helpim yumi long putim gut yau na kisim save?—Lo 31:12.
2. Yumi ken mekim wanem bilong redim tingting na bel bilong yumi?
2 Paslain Long Kibung Distrik: Ol i putim program bilong kibung distrik, we i gat olgeta het tok na wanpela o tupela skripsa i as bilong ol wan wan tok, long Web-sait bilong yumi, www.jw.org. Sapos yumi gat Intenet long kompiuta samting, yumi ken lukim ol dispela tok bilong program paslain long kibung na dispela bai helpim yumi long redim tingting na bel bilong yumi. (Esr. 7:10) Olsem wanem? Yupela inap makim haptaim long Famili Lotu bilong stori long ol dispela tok bai kamap long kibung?
3. Wanem samting bai helpim yumi long putim gut yau?
3 Taim Bilong Kibung: I gutpela sapos yupela i yusim toilet paslain long program i kirap. Na yumi ken pasim fon na bai krai bilong en i no ken pulim tingting bilong ol narapela o salim teks mesis long taim bilong program. Sapos i gat as na fon bilong yu i on, orait putim long vaibret na bai em i no ken distebim ol narapela. Sapos yu yusim kain samting olsem liklik kompiuta ol i kolim tablet, orait yusim long pasin we i no ken pulim ai na tingting bilong ol narapela. No ken kaikai o dring long taim bilong program. (Sav. 3:1) Putim tingting i go long brata bilong mekim tok. Taim em i ritim skripsa, bihainim long Baibel bilong yupela, na raitim sampela tok bilong kibung.
4. Olsem wanem ol papamama inap lainim ol pikinini long putim gut yau na kisim save?
4 Yumi laik bai ol pikinini tu i mas putim gut yau na kisim save. Sindaun 29:15 i tok: “Sapos pikinini i bihainim laik bilong em yet oltaim, orait em bai i mekim mama bilong en i sem.” Olsem na i gutpela long famili olgeta i ken sindaun wantaim na bai papamama inap helpim ol pikinini long putim gut yau long ol tok, no ken toktok, salim teks, o wokabaut nating i go i kam. Maski ol i liklik tumas na ol i no inap kliagut long ol tok, papamama i mas lainim ol long sindaun isi na no ken slip.
5. Olsem wanem pasin bilong stori gen long ol tok bai helpim yumi? Yumi ken mekim olsem wanem?
5 Taim Program i Pinis Long Ol Wan Wan De: No ken stap i go biknait. I gutpela yupela i slip hariap long nait na kisim gutpela malolo. Stori long ol tok yupela i bin harim na dispela bai helpim yupela long tingim tingim inap longpela taim. Olsem na i gutpela long famili i ken makim sampela haptaim bilong stori long ol dispela tok. Sapos yu go long haus kaikai wantaim ol pren, i gutpela long kisim notbuk na stori long wanpela o tupela poin em yu laikim tru. Bihain long kibung taim yupela i go bek long ol wan wan hap bilong yupela, yupela i ken makim haptaim long Famili Lotu na stori long olsem wanem famili i ken bihainim ol dispela tok. Na tu, yupela i ken makim taim bilong famili i lukim o stori long sampela hap bilong ol nupela buk samting yumi kisim.
6. Sapos yumi go tasol long kibung, yu ting dispela inap helpim yumi? Stori long dispela.
6 Long bung we i gat planti kaikai, dispela ol kaikai i no inap helpim man sapos em yet i no kisim kaikai na kaikai. Em i wankain long kibung distrik we i gat planti gutpela tok bai kamap. Yumi mas insait long olgeta hap bilong program na putim gut yau, bihainim ol tok yumi harim, na dispela bai helpim tru yumi.