“Singautim Olgeta Manmeri i Kam Bung”
1. Ol kibung rijinel na intenesenel i gat wanem ol samting i wankain long bikpela kibung bilong ol Israel bihain liklik long ol i lusim Isip?
1 Liklik taim tasol bihain long ol Israel i lusim Isip, Jehova i tokim Moses long “singautim olgeta manmeri i kam bung” long maunten Sainai long harim tok bilong Em na bai ol i daun long em na skulim ol pikinini bilong ol long ol pasin bilong Em. (Lo 4:10-13) Em wanpela bikpela bung ol i no inap lusim tingting long en na i strongim tru bilip bilong ol! Sampela mun bihain, lain bilong Jehova bai bung long ol kibung rijinel na intenesenel na bai Jehova i skulim yumi. Yumi mas mekim wanem na bai ol dispela kibung i helpim yumi?
2. Yumi mas mekim wanem bilong “redi” long kibung?
2 Yupela “i Mas Redi”: Jehova i tokim ol Israel long “ol i mas redi” long dispela bikpela bung i bin kamap long bipo long maunten Sainai. (Kis. 19:10, 11) Olsem tasol, yumi olgeta husat bai go long kibung yumi mas redi gut, maski yumi gat tok o insait long sampela hap bilong kibung o nogat. Olsem: Ating planti i mas stretim tok wantaim bos na bai ol i ken kisim malolo long wok na go long kibung. Ating yumi gat wankain hevi olsem Nehemia. Em i laik kisim malolo long wok bilong em, olsem man bilong lukautim wain bilong King Artaserksis, na bai em inap go long Jerusalem na helpim wok bilong wokim banis, tasol em i save olsem king i no inap givim tok orait long em. Olsem na Nehemia i beten, na em i strongim bel na go kamapim tingting bilong em long king. King i givim tok orait long em long go, na tu, em i givim ol samting long Nehemia bilong helpim wok bilong wokim banis! (Neh. 2:1-9) Ating yu askim bos pinis long kisim malolo, tasol olsem wanem long rot bilong go na ples slip, yu stretim pinis? Ol elda bai amamas long helpim ol bratasista husat i laik kisim helpim. Yumi mas stretim ol samting na bai yumi inap go kamap long ples kibung paslain long program i kirap long olgeta 3-pela de, na redi long “tingting strong tru” long putim gut yau long ol tok bai yumi harim.—Hib. 2:1.
3. Wanem samting bai helpim yumi long redim bel na tingting bilong yumi?
3 Narapela bikpela samting yumi ken mekim bilong redi, em yumi mas redim bel na tingting bilong yumi na bai yumi inap putim gut yau na kisim save. (Esr. 7:10) Bai ol i putim program bilong kibung rijinel long jw.org/tpi Web-sait, na i gat lista bilong olgeta tok wantaim wanpela o tupela skripsa i as bilong ol wan wan tok. Long dispela rot, ol famili i ken stori long ol dispela tok long taim bilong Famili Lotu, long ol wik paslain long kibung i kamap. Sampela pablisa i save prinim dispela program na mekim olsem notbuk bilong raitim sampela tok bilong kibung long en.
4. Olsem wanem ol papamama inap skulim ol pikinini long taim bilong kibung?
4 ‘Skulim Ol Pikinini Bilong Yu’: Baibel i kolim wanpela as bilong dispela kibung long maunten Sainai, em long ol papamama Israel i mas “skulim ol pikinini bilong ol.” (Lo 4:10) Kibung i opim rot long ol papamama i mekim wankain samting. Ol papamama i mas kisim ol pikinini bilong ol na sindaun wantaim ol long taim bilong kibung na helpim ol long putim gut yau. Long pinis bilong olgeta wan wan de, na bihain, long taim bilong famili lotu ol famili i ken stori wantaim long ol tok bilong kibung.
5. Taim yumi go long kibung bai kamap, dispela bai helpim yumi olsem wanem?
5 Dispela bikpela kibung long maunten Sainai i bin helpim ol Israel long pilim tru dispela gutpela samting ol i holim, olsem ol i stap lain manmeri bilong God. (Lo 4:7, 8) Ol kibung bilong yumi nau bai kamap, em ol i redim bilong helpim yumi long wankain pasin. Inap tripela de bai yumi no tingting long ol samting bilong dispela graun bilong Satan, tasol bai yumi amamas long kisim nupela strong long harim ol tok bilong God na bung wantaim ol bratasista bilong yumi. (Ais. 35:7-9) De bilong Jehova i wok long i kam klostu, olsem na yumi no ken lusim pasin bilong bung wantaim na mekim ol tok i strongim narapela narapela!—Hib. 10:24, 25.