Putim Gut Yau Long Harim Tok Bilong God
1 I no olgeta tok ol man i mekim em yumi mas putim yau long en. Tasol taim God i mekim ol tok, i gat gutpela as tru na yumi mas harim tok bilong em. (Lo 28:1, 2) I gat sampela man “God i bin givim tok bilong en long ol” na ol i raitim ol dispela tok bilong helpim yumi, na yumi ken tenkyu tru long dispela. (Ro 3:2) Kibung distrik bilong yumi long dispela yia em i gutpela rot bilong harim ol dispela tok bilong God taim ol i kaunim na stori long ol dispela tok. Olsem wanem yu inap putim gut yau?
2 Kam Kwiktaim Long Olgeta Moning: Tingim amamas bilong ol Israel taim ol i harim olsem ol i mas i go na bungim Jehova long maunten Sainai bilong harim Lo bilong em! (Kis 19:10, 11, 16-19) Sapos yu gat wankain tingting long kisim ol tok bilong Jehova long kibung distrik, orait yu bai stretim rot bilong kam kwiktaim long olgeta de. Taim yumi kam bihaintaim yumi no inap harim olgeta tok bilong program, na taim yumi hatwok long painim ples sindaun, dispela bai pulim ai bilong ol narapela na ol i no harim gut tok. Tingim, program bai kirap long 9 klok moningtaim long olgeta de.
3 Maski sampela i kam paslain, ol tu i no save sindaun long sia bilong ol taim program i kirap. Em i no gutpela. Ol i save toktok wantaim ol pren inap long taim siaman i kolim singsing na nau ol i pinis long toktok na ol i go sindaun long sia bilong ol. Yumi mas lukim olsem sampela minit paslain long mekim singsing bilong kirapim program, siaman bai sindaun long pletfom long taim musik bilong kirapim program i kirap. Dispela i makim olsem em taim bilong yumi mas sindaun long sia bilong yumi! Orait taim siaman i kolim singsing bilong kirapim program, yumi redi pinis long mekim singsing wantaim bilong litimapim nem bilong Jehova.
4 Harim Tok Wantaim Olsem Wanpela Famili i Stap Wanbel: Taim ol i kaunim ol lo bilong God long ol lain Israel i bung, ol famili na ol “pikinini” tu i mas putim yau long ol tok na lainim ol samting. (Lo 31:12) Long ol kibung bilong yumi, yumi no ken larim “pikinini i bihainim laik bilong em yet” na raun raun nating. (Snd 29:15) Ol papamama, yupela i mas stretim rot na bai yupela famili olgeta i ken sindaun long wanpela hap tasol—ol bikpela pikinini tu wantaim. Sampela papamama i save wet i go na taim singsing bilong kirapim program i kirap ol i kisim ol pikinini i go long toilet. Tasol taim ol i mekim olsem ol i no lainim pikinini bilong ol long tingim olsem singsing na beten i bikpela samting long lotu bilong yumi. Em i gutpela long kisim ol pikinini i go long toilet paslain long taim ol program i kirap!
5 Yumi mas slip gut long olgeta nait na yumi no ken kaikai tumas long belo; dispela bai helpim yumi na yumi bai putim gut yau long ol tok. Harim gut ol tok brata i mekim. No ken larim tingting i wokabaut. Opim Baibel na bihainim brata taim em i kaunim ol skripsa. Raitim sampela tok. Taim wanpela brata i mekim tok, tingim gen ol tok brata i mekim na skelim olsem wanem yu ken bihainim dispela tok. Taim yu go bek long ples slip long apinun, toktok wantaim famili bilong yu long ol tok i bin kamap long program. Ol wan wan long famili i bin lainim wanem ol tok? Olsem wanem famili bilong yu inap mekim gut wok long ol dispela tok?
6 Daun Long Tok Bilong God: Ol kibung i gutpela rot tru bilong yumi ken toktok wantaim ol pren na strongim narapela. Sapos yumi kam hariap, bai yumi gat taim bilong toktok wantaim ol narapela paslain long program i kirap. Tasol sampela i save toktok wantaim long taim bilong program, na ol i ting dispela haus kibung em bikpela haus na ol i no pulim tumas ai bilong ol narapela. Tasol dispela tingting i kranki. Maski yumi mekim ol miting i gat planti manmeri i bung long en, em i wankain tasol olsem wanpela miting yumi mekim long Haus Kingdom na em i taim bilong harim ol tok. No ken mekim wok long ol telefon ol i save karim raun, o wanpela masin olsem telefon ol i kolim pager, ol video-kamera, na ol kamera long taim bilong program, long wanem, dispela inap pulim ai bilong ol man.
7 Taim Moses i kisim Lo long Jehova, “em i no kaikai wanpela samting na i no dring wara.” (Kis 34:28) Olsem tasol, em i no stret long yumi kaikai o dring wara samting long taim ol i mekim yet ol tok bilong program. Sampela man i gat sampela kain bikpela sik na ol i mas kisim kaikai na wara samting bilong helpim ol, tasol sapos yu no olsem, yu ken wet inap long “taim” stret bilong kaikai.—Sav 3:1.
8 Long sampela kibung mipela i bin lukim olsem long taim bilong program ol brata na sista na ol pikinini tu, ol i save raun raun ausait, long hap bilong putim ol ka na long toilet. Mipela bai toksave long ol atendan long tokim ol kain lain olsem long i go bek sindaun long haus kibung. Ol brata i wok volantia long narapela narapela dipatmen, kwiktaim ol i mas i go sindaun long sia bilong ol taim ol i pinisim wok ol i mekim. Ol volantia i gat wok long taim bilong program ol i ken wok, tasol ol narapela i no mekim wok long taim bilong program, ol i mas sindaun long sia bilong ol na harim tok bilong program. Ol i no ken stap longpela taim long dispela dipatmen na narapela i raun na lukim narapela long taim bilong program.
9 Yumi no ken pasim tingting bilong yumi long taim yumi harim Tok Bilong God. (Hi 5:11) Olsem na yumi mas pasim tok long bel olsem yumi bai daun na putim yau long harim gut ol lo bilong Jehova taim ol i kamapim long kibung distrik bilong yumi long dispela yia.