Bung Wantaim Long Litimapim Nem Bilong Jehova
1 Jehova i gat olgeta strong, gutpela tingting na save bilong em i pulap tru, pasin bilong em i stret olgeta, na em i as bilong pasin bilong laikim ol narapela. Olsem Man bilong wokim olgeta samting, Man bilong givim laip long yumi, na King bilong heven na graun, i stret yumi lotuim em wanpela tasol. (Sng. 36:9; KTH 4:11; 15:3, 4) “Givim Biknem Long God” Kibung Distrik bilong dispela yia bai strongim laik bilong yumi long litimapim nem bilong dispela wanpela God tru.—Sng. 86:8-10.
2 Stretim Gut Ol Samting: Bilong yumi ken kisim gutpela helpim long kaikai bilong spirit em Jehova i bin redim, em i bikpela samting yumi mas stretim gut ol samting. (Ef. 5:15, 16) Olsem wanem? Yu stretim pinis hap bai yu slip long en, na rot bilong i go long kibung, na yu kisim sampela de malolo long wok mani o skul? No ken wet inap long taim bilong kibung i klostu. Sapos yu no askim bos hariap long kisim sampela de malolo, ating bai yu lus long sampela hap bilong dispela gutpela kibung. Yumi olgeta i mas i stap long olgeta hap bilong program.
3 Putim mak olsem long olgeta de yu bai kamap long ples kibung paslain long program i kirap. Dispela bai helpim yu long sindaun gut long sia bilong yu paslain long namba wan singsing i kirap na em bai helpim yu long redim tingting bilong yu long kisim ol tok ol brata bai mekim. Program bai kirap long 9 klok moningtaim long olgeta de. Plis, makim ol sia bilong famili bilong yu tasol o ol man i kam wantaim yu long kibung.
4 Ol brata i laik olgeta i kisim kaikai bilong ol i kam long kibung na ol i no ken lusim ples kibung bilong painim kaikai long taim bilong malolo long belo. Sapos yu bihainim dispela tok, dispela bai helpim olgeta long i stap bel isi na em bai givim sampela haptaim moa bilong bung wantaim ol wanbilip. (Sng. 133:1-3) Plis tingim olsem yumi no ken kisim ol samting ol i wokim long glas o bringim bia samting i kam long ples kibung.
5 Putim Yau na Kisim Save: Long rot bilong beten Esra i bin redim bel bilong em long kisim ol tok bilong God. (Esr. 7:10) Em i bin wok strong long kisim save long ol tok bilong Jehova. (Snd. 2:2) Yumi ken redim bel bilong yumi bilong kisim ol gutpela tok bilong kibung paslain long yumi lusim haus. Yumi ken mekim olsem taim yumi tingim long bel as tok bilong kibung na toktok long en wantaim famili bilong yumi.
6 Long bikpela ples kibung i gat planti samting bilong lukim na ol kain kain nois bilong pulim tingting bilong yumi. Kain samting olsem inap mekim na yumi no putim gut yau long ol brata i mekim tok. Taim dispela samting i kamap, ol gutpela tok bai lus nating. Ol tok i stap long blok bilong dispela stori inap helpim gut yumi long putim gut yau.
7 Tingim Ol Narapela: Yumi ken mekim wok long kamera na video-kamera long taim bilong program, tasol no ken pulim ai o tingting bilong ol narapela; yumi ken mekim tasol wok long en taim yumi sindaun long sia bilong yumi. Sapos i gat as na yumi mas lusim sia bilong yumi bilong i go ausait yumi mas kam bek hariap. Sampela i bin sindaun ausait na lusim sampela bikpela hap bilong program. Maski i hatwok long sindaun planti aua long ples i hat, yumi mas pasim tok long bel olsem yumi bai sindaun long olgeta hap bilong program. Mipela bai toksave long ol atendan long tokim ol manmeri i sindaun ausait o wokabaut nating long ol i mas go bek na sindaun long haus kibung. Long taim bilong program olgeta volantia ol i mas sindaun wantaim odiens taim wok bilong ol i pinis.
8 Man! Yumi olgeta i amamas long bung wantaim bilong litimapim nem bilong Jehova! Yumi mas tingting strong long givim biknem long em long rot bilong stap long olgeta hap bilong program, na putim gut yau, na bihainim ol samting yumi lain long en.—Lo 31:12.
[Askim Bilong Stadi]
1. Wanem as tok bilong kibung? Bilong wanem i stret yumi litimapim nem bilong Jehova?
2, 3. Olsem wanem pasin bilong stretim gut ol samting bai helpim gut yumi?
4. Bilong wanem ol brata i laik yumi olgeta i kisim kaikai i kam long kibung?
5. Olsem wanem yumi inap redim bel bilong yumi bilong kisim gut ol tok bilong kibung?
6. Wanem samting inap helpim yumi long putim gut yau long ol tok bilong program? (Lukim blok.)
7, 8. Olsem wanem yumi inap soim olsem yumi tingim ol narapela? Bilong wanem i gutpela yumi go bek hariap long sia bilong yumi?
[Blok long pes 1]
Putim Yau Long Taim Bilong Kibung
▪ Tingim gut ol het-tok
▪ Lukim ol skripsa
▪ Raitim ol sotpela tok
▪ Raitim ol tok yu laik bihainim
▪ Riviu long samting yu lain long en