“Yumi Litimapim Nem Bilong Em”
1 Man bilong raitim song i tok: “Yumi tokaut long biknem bilong God. Yumi litimapim nem bilong em.” (Sng. 34:3) Long “Wokabaut Wantaim God” Kibung Distrik bilong yumi em liklik taim bai kamap, yumi wantaim ol bratasista bilong yumi long planti kongrigesen, yumi olgeta bai i gat rot long litimapim nem bilong Jehova. Olsem wanem? Yu stretim pinis rot bilong painim ples slip, trenspot, na bilong kisim sampela de malolo long wok skin bilong yu? Em i savepasin long mekim ol dispela samting paslain tru long taim bilong kibung.—Snd. 21:5.
2 Taim Yumi Kamap Long Ples Kibung: Taim yumi go long wanpela kibung, i gat planti samting yumi mas tingim. Sapos yumi lusim ples slip hariap, dispela bai helpim yumi sapos sampela samting i kamap na i pasim yumi liklik, na bai yumi gat taim bilong kisim ples sindaun na givim bel olgeta long insait long beten na singsing bilong kirapim program. (Sng. 69:30) Sampela minit paslain long program i kirap, siaman bai sindaun long pletfom long taim ol i pilaim musik bilong kirapim program. Long dispela taim yumi olgeta i mas sindaun long sia bilong yumi na bai program i kirap long pasin i stret.—1 Ko. 14:33, 40.
3 Baibel i tok yumi mas ‘givim bel bilong yumi long God na long ol man, na long dispela pasin yumi mas mekim olgeta samting yumi save mekim.’ (1 Ko. 16:14) Taim ol dua i op long 8 klok moningtaim, pasin bilong tingim ol narapela bai pasim yumi long ran hariap o subim nabaut ol narapela bambai yumi ken kisim kwik ol sia yumi save laikim. Yu ken kisim tasol sia bilong ol manmeri i kam wantaim yu long ka o ol lain yupela i stap wantaim long wanpela haus.—1 Ko. 13:5; Fl. 2:4.
4 Plis bringim kaikai na bai yu no ken lusim ples kibung long belo bilong i go baim kaikai. Dispela bai givim rot long olgeta i ken amamas long bung wantaim na stap redi pinis taim program bilong belo bek i kirap. Sapos i gat wok long mekim olsem, orait putim kaikai insait long liklik eski na bai yu inap putim aninit long sia. No ken bringim ol bikpela eski o ol kontena ol i wokim long glas, na bia samting i go long ples kibung.
5 Sampela bratasista i gat pasin bilong i go baim dring na kaikai klostu long ples kibung. Ol lain i save salim ol samting arere long rot ol i bin lukim dispela na nau ol i kam salim ol dring na kaikai klostu long haus kibung. Dispela pasin i no gutpela. Sapos yumi bihainim tok yumi bin kisim long bringim liklik kaikai bilong yumi yet long belo, dispela bai pasim ol lain bilong salim kaikai na ol i no ken bung bung ausait long ples kibung na painim sampela bilong baim kaikai long ol.
6 Bikpela Kaikai Bilong Spirit i Wetim Yumi: King Jehosafat i bin “redim bel bilong [em] long painim God tru.” (2 Sto. 19:3, NW ) Taim kibung i no kamap yet, yumi ken mekim wanem bilong redim bel bilong yumi? Ol stori i stap long laspela pes bilong Awake! bilong Me 22, 2004 na Jun 8, 2004 i kamapim sampela tok bilong dispela bikpela kaikai bilong spirit yumi bai kisim. I gutpela yumi lusim haptaim long tingim gen ol dispela tok, na strongim moa yet laik bilong yumi long kisim ol dispela kaikai bilong spirit em Jehova i redim bilong yumi. Bilong redim bel bilong yumi i makim tu olsem yumi mas askim Jehova long helpim yumi long kisim gut ol tok yumi bai harim na yumi ken bihainim ol dispela tok.—Sng. 25:4, 5.
7 Yumi olgeta i laikim tumas long kisim sampela save moa long tok bilong Baibel, long wanem, yumi save olsem long dispela rot yumi inap kamap strong na bai God inap kisim bek yumi. (1 Pi. 2:2) Olsem na yumi mas i kam bung long “Wokabaut Wantaim God” Kibung Distrik na yumi olgeta wantaim i ken ‘litimapim nem bilong God.’—Sng. 34:3.
[Askim Bilong Stadi]
1. Yumi bai gat wanem rot long litimapim nem bilong Jehova? Long nau yumi ken mekim wanem bilong redi long mekim olsem?
2. Bilong wanem i gutpela long stretim rot bilong kamap long ples kibung paslain long program i kirap?
3. Taim yumi laik painim sia, olsem wanem yumi ken soim olsem yumi tingim gut ol narapela?
4. Ol i laik bai yumi mekim wanem long taim bilong malolo long belo? Dispela bai helpim yumi olsem wanem?
5. Taim yumi bringim kaikai bilong yumi yet, wanem samting i no ken kamap?
6. Olsem wanem yumi ken redim bel bilong yumi long kisim ol tok bilong skulim yumi?
7. Yumi gat laik long mekim wanem? Bilong wanem?
[Blok long pes 1]
Taim Bilong Program Bilong “Wokabaut Wantaim God” Kibung Distrik Bilong 2004
Fraide na Sarere
9:00 a.m. i go 4:40 p.m.
Sande
9:00 a.m. i go 3:35 p.m.