Nupela Pasin Bilong Mekim Riviu Long Ol Tok Bilong Kibung
Long taim pasin bilong dispela graun i wok long i go nogut tru, Jehova i strongim yumi long “lusim pasin bilong givim baksait long God na long lusim olgeta laik nogut bilong dispela graun, na . . . tingting gut na wokabaut stret. Tru, yumi stap namel long ol manmeri bilong dispela graun, tasol marimari bilong God i skulim yumi long bihainim pasin bilong God.” (Ta. 2:12) Ol kibung sekit na spesel de kibung i save kamap long olgeta yia, ol i hap bilong ol samting Jehova i save givim yumi long rot bilong “wokboi i gat gutpela tingting.” (Mt. 24:45) Ol dispela bung bilong lotu i save strongim tru yumi!
Bilong helpim yumi long tingim na bihainim ol tok yumi harim pinis, bai yumi mekim wok long nupela pasin bilong mekim riviu long ol tok bilong kibung long dispela yia 2005. Long pes 7 i go 8 long dispela namel pepa bilong Wok Kingdom, ol i kamapim sampela tok em bai kamap long kibung na ol askim bilong riviu long program bilong ol wan wan kibung. Ol kongrigesen bai toktok long ol dispela tok long Miting Bilong Wok paslain liklik long kibung i kamap na bihain liklik long taim ol i mekim pinis kibung. Ol i ken mekim olsem wanem?
Wanpela o tupela wik paslain long kongrigesen i go long kibung, wanpela brata bai mekim wanpela tok inap 10-pela minit long “Nupela Program Bilong Kibung Sekit” bilong redim tingting bilong ol brata long ol tok bai kamap. Na tu, em bai kirapim ol bratasista long lukim ol askim bilong riviu na em bai kirapim olgeta long raitim sampela tok bilong kibung bilong redim ol yet long riviu bai kamap bihain long kibung.
Sampela wik bihain long kibung, long hap bilong Miting Bilong Wok, bai i gat riviu inap 15 minit long program bilong namba wan de bilong kibung. Long wik antap, ol bai mekim riviu inap 15 minit long program bilong namba tu de bilong kibung. Ol askim bilong riviu mipela i raitim long dispela namel pepa bai stap olsem as bilong ol tok bilong riviu. Riviu i mas kamapim ol tok em inap helpim gut yumi. Ol elda i ken stretim ol samting na bai ol i ken sotim, o lusim sampela tok, o senisim sediul bilong ol tok bilong Miting Bilong Wok bambai ol i ken mekim ol dispela riviu.
Ol i ken bihainim wankain pasin long mekim riviu bilong spesel de kibung, tasol ol bai mekim wanpela 15 minit riviu long olgeta tok bilong program. Yumi olgeta i laik putim gut dispela namel pepa bilong Wok Kingdom na mekim wok long en bambai yumi ken kisim gut helpim long ol gutpela tok Jehova i save skulim yumi long en.—Ais. 48:17, 18.