Nupela Program Bilong Spesel De Kibung
Ol Kristen bilong pastaim i bin kisim strong long holi spirit na ol i taitim bun tru long autim gutnius long olgeta hap. (Ap. 1:8; Kl. 1:23) Program bilong spesel de kibung bilong sevis yia bilong 2007, em ‘Wok Strong Long Autim Tok Bilong God,’ em bai helpim yumi long bihainim dispela gutpela pasin bilong ol.—Ap. 18:5.
King Devit i toktok long tok bilong God olsem: “Tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save.” (Sng. 19:7) Dispela program bilong spesel de kibung bilong 2007 em ol i bin redim gut, em bai kamapim klia olsem Baibel em i nambawan samting bilong “stretim wokabaut bilong yumi” na em bai kirapim yumi long mekim wok long Baibel bilong autim tok na skulim ol man na mekim strong olsem taim i sot pinis. (2 Ti. 3:16, 17) Nupela program bai soim yumi long olsem wanem yumi ken abrusim ol samting i laik pundaunim yumi na bihainim ol stiatok bilong Baibel long i stap bilong yumi bilong helpim yumi long olgeta de. Na nupela program bai helpim yumi long mekim wok long Baibel bilong helpim ol yangpela na ol nupela manmeri long kamap strong long ol samting bilong spirit.
Pasim tok long bel olsem yu bai stap pinis long kibung taim program i kirap, na putim gut yau long ol tok i kamap. Raitim sampela sotpela tok long notbuk em yu yet inap bihainim long i stap bilong yu. Harim gut ol tok bilong skulim yu na ol tok bilong kirapim gen tingting em yu kisim long kibung, na tingting long olsem wanem yu ken bihainim ol tok yu lainim.
Spesel de kibung bai helpim yumi long pilim tru na tenkyu long tok bilong Baibel, na i kirapim tingting bilong yumi long yumi mas i stap strong yet long autim gutnius bilong Kingdom na wok strong long mekim. Na em bai soim yumi long olsem wanem yumi ken helpim ol narapela long mekim olsem. Olsem na yu mas pasim tok long bel olsem yu no ken lusim wanpela hap tok bilong stiaim yumi na skulim yumi em Jehova i givim yumi long rot bilong dispela program!—Ais. 30:20b, 21.