‘Laik Bilong God i Mas Kamap’
1. Wanem tim bilong spesel de kibung bilong 2012? Bilong wanem i stret long yumi skelim dispela samting?
1 Long laik bilong Jehova yet em i bin wokim yumi. (Rev. 4:11) Olsem na bilong inapim ol samting em i laik yumi mas mekim long i stap bilong yumi, yumi mas kisim save long God na mekim laik bilong em. Tasol i hatwok long mekim olsem, long wanem yumi mas pait wantaim ‘ol samting em bodi . . . na tingting bilong yumi i laikim,’ o laik bilong yumi long bihainim “pasin bilong ol manmeri bilong graun.” (Efe. 2:3; 1 Pita 4:3; 2 Pita 2:10) Sapos God i no helpim yumi, ‘Satan inap holimpas yumi long bihainim laik bilong em.’ (2 Tim. 2:26) Spesel de kibung bilong 2012 bai helpim yumi olgeta long mekim wok i stret wantaim namba 3 samting Jisas i kolim long beten bilong em, olsem “laik bilong yu i mas kamap.”—Mat. 6:9, 10.
2. Bai yumi kisim bekim bilong wanem ol askim long kibung?
2 Ol Askim Bai Yumi Kisim Bekim Long En: Taim yumi harim ol tok bilong program, traim long tingim bekim bilong ol dispela askim: Wanem samting i bikpela samting wankain long pasin bilong harim Tok Bilong God? Olsem wanem yumi ken save gut long ol samting God i laik bai yumi mekim? Bilong wanem yumi mas redi long helpim olgeta kain man? Yumi inap mekim wanem na bai yumi amamas long laip bilong yumi? Ol yangpela, yupela i mas kamapim klia long Jehova wanem samting? Wanem ol gutpela samting i kamap taim yumi mekim laik bilong God? Bilong wanem em i bikpela samting long yumi strongim bel bilong ol narapela?
3. Yumi ken mekim wanem na bai ol tok bilong kibung i ken helpim yumi?
3 Yu mas stap long kibung na putim gut yau long tok bilong kibung. Brata i kam long brens o wanpela wasman raun bai mekim sampela tok. Paslain long program na bihain long en, yu ken go toktok wantaim em na meri bilong em, sapos em marit. Taim yupela i go bek long haus, no ken “lusim tingting” long ol tok yupela i harim, i gutpela yupela famili i toktok long ol samting yupela i harim na olsem wanem yupela i ken mekim ol samting i stret wantaim laik bilong God.—Jems 1:25.
4. Bilong wanem em i bikpela samting long yumi putim laik bilong God i stap nambawan samting?
4 Ol man i bihainim laik bilong ol yet na ol i no laik bihainim laik bilong Jehova, klostu nau ol bai bagarap. (1 Jon 2:17) Olsem na yumi amamas olsem Jehova i redim ol dispela gutpela tok long taim stret bilong helpim yumi long putim laik bilong em i stap nambawan samting!